AutorIn des Beitrages:
Fischer Wilhelm
4650 Lambach
wilhelm.otto.fischer@gmx.net
Zurück | Dö Ehrfuarcht
Da Hümmö bennt.
Am Horizont a Feiasee.
A rodö Kugö, d Sunn,
foidd owar aus da Heh.
Kunnst moana, sö daschlogt
oda vabrennt dö Wödd.
Voar vülö, vülö Joahr
hobm dös d Leit glabt. Weit gföhdd!
Wüd gfiarcht hobm sa si dennat.
Wundan tuats mi ned,
dass volla Aungst dö Sunn
ois Gottheit hobm aubett.
Dö Erdn bebt.
Da Berg haut kilometaweit
in d Hech dö Lava.
Und wieda fiarchtn si dö Leit,
weuls moanan, da Vuikan vaschluckts.
Wundan tuats mi ned,
dass volla Aungst in Berg
ois Gottheit hobm aubett.
Da Ozean tobt.
Haushochö Wölln spucktar ins Laund
und schwoabt oiss zruck ins Wossa,
wos glebt hodd nu am Straund.
Kloa winzi kemmand si d Leit via.
Wundan tuats mi ned,
dass volla Aungst dös Meer
ois Gottheit hobm aubett.
Heit wiss mas:
Gottheitn zan Fiarchtn, dö gibts ned!
Fia d Menschheit owa wars ned schlecht,
waunns stott da Fuarcht an Ehefuarcht hädd
vua da Natua.
Sinst miass mas goar am End nu biassn,
weul mas, beieidigt, wias afd is,
doo wieda fiarchtn miassn. |
