AutorIn des Beitrages:

Gipföstürmer

Herrlich is´s, wannst stehst am Gipfö,
ausbroat´t liegt vor dir dö Welt,
kimmst da vir als wia ra Kinig,
wahrhafti wia ra groaßa Held.

Es gibt in Lebm manch schene Zeitn,
wosd vor Glück bist ganz hoch obm,
doh ´s Glück is iawand ah recht launisch,
lasst dih net oiweil da drobm.

Drum nimm dei Lebm fest ö d´Händd,
ob´s stürmisch is, ob sche(n),
dann wirst ganz sicher du am End
ganz drobm am Gipfö steh(n).