AutorIn des Beitrages:
Fischer Wilhelm
4650 Lambach
wilhelm.otto.fischer@gmx.net
Zurück | D Schwoibm
Mein Text ...
Hostas scho gsehgn?
Dö Schwoibm sand do!
Gestan sands kemma.
Mei, bin ih froh!
Van Südn unt
sands auffazogn
und üwa d Oipn
drüwagflogn.
Hiatzt sausns volla
Gaudi umma
und bleibm ba ins
in gaunzn Summa.
Ban Stoi hiebei
bauns eah Dahoam,
a kunstvois Nest
aus laudda Loahm.
Duat fuadans
eahnre Jungan groß.
Dö fressn vü,
ih sog da wos!
Fümf Schnowön siahgst
in gaunzn Tog.
Sand oiweu hungri,
ohne Frog!
Fia d Oidn iss
a grosse Müah,
a gwoiddi grosse,
kimmt ma viar.
Wia vülö Fliagn
miassn dö faunga,
dass fiar fümf
Schwoibmkinda glaunga!
So sögölns hoidd
und gebm koa Ruah.
Und ih, ih schau
begeistat zua.
Iss Weda schee
fliagns i da Heh.
Iss grob, daunn
düsns üwan See.
Gach rutschns midn
Bauch am Wossa,
steign wieda auffi
ois a nossa.
Oa Kurvn links,
oan Bogn an rechtn
und daunn an Looping,
und koan schlechtn!
In Tiafflug owa,
ummi ums Egg.
Afd siahgt mas nimma,
weu daunn sands wegg.
Naa! Do sands scho wieda!
Sö gebm koa Ruah!
Und ih, ih schau
begeistat zua!
Und wünsch ma,
wiar ihs sögöln siahg:
"Oamoi in Lebm mechat ih aa,
dass ih soo kunstvoi fliag!"
|
