AutorIn des Beitrages:
Fischer Wilhelm
4650 Lambach
wilhelm.otto.fischer@gmx.net
Zurück | S Vogöparadies
Dö Birkn draussd in Goartn is
a richtigs Vogöparadies.
In dera treibm in gaunzn Summa
sih Vogömusikantn umma.
Dö Aumsl singt Koloratur.
Da Buachfink tiriliert dazua.
Dö Moasn zwitschadd volla Lust.
Da Spotz ziapt aa mit stoiza Brust.
Dö Öistan schmeddat wia d Trompetn.
Da Specht schreidd Atonalitätn.
Da Ringötauba gurrt schee brav
stakkato zuawö dö Oktav.
In hochn Ton pfeift maunchmoi noo
da Sperba af sein Piccolo.
Schee singt da Stieglitz und er schilladd,
daweu da Gümpö kunstvoi trilladd.
A Bosssolo krachzt laut da Krauna,
sist kaunna nix, dös owa kaunna.
Dö Starln tretn af ois Choar
und ziahgn dö schrülle Tonoart voar.
Dö Schoar ergänzt nu dö Braunölln.
Da Kleiba dearf af koan Foi föhln,
und s Rotkehlchen singt seidd da Fruah
midd ihra zoartn Stimm dazua.
Dö Doihn spüdd wundaboar dö Flötn.
Grod d Rotschwaunzmuadda is in Nötn,
weu ihre Rotschwaunzkindaschoar
duriganaundsingt, schaudaboar!
Oiss zaumm iss, wias a jeda heart,
a buntes Vogögsaungskonzert.
Jo! Jo! Mia hobm, dös is gwiess,
a herllichs Vogöparadies
in insra Birkn, drausd in Goartn,
midd üwa fufzehn Vogöoartn.
Hiatzt sitz ma do in olla Ruah
und losn dera Musi zu.
|
