AutorIn des Beitrages:

Da Liachtblick

Ea hod si de Dek'n nu festa um de Schuitan zogn. Eam is koid gwen. Drausn hod's gaunz fei owagnieslt. Da Nöwi is üwaroi einigreit. Des Heisl, wo er gwont hot, is scho recht oit gwen. Jeden Erschtn hot er grod nu den Zins zaumkrozt. Es is hoit net leicht fia an Schriftstölla.
Andreas Kettler hot ea ghoasn. Ea woa zwoa eascht 30 Joa, owa wea eam ned kennt, hät eam leicht auf 40 gschäzt. S Lebm hot's ned guat gmoat mit eam. Des siacht ma a aun de fün weissn Hoa.
Miad hod a se wida zan Disch gsizt. Der is a sau mauoid und wiad nua mea fon Hoizwiam, Leim und a boa Nägin zaumghoin. Oan Disch, oa Bett, oa Sessl und oan maroden Kosten mit a boa zrissnen Hoddan. Des is sei gaunza Besitz.
Mit an schwa'n Raunza foada se üba s Gsicht. De Schreibmaschin vor eam is nu de Erste, de wos ea se hoat dasboat hot. Schei gloaweis mocht ea wida weida.
Da Famida klopt aun 'd Dia.
"Eh, Schreibaling! Wos is mit 'n Zins?" Da Andreas schaut zua Dia und sogd: "Nägste Wocha griagstn bestimmi. I faschbrich da's." "Na guat. Owa des is des lezte moi. Ban näxtn Moi, Fliagst!" Na god sei daun. Desmoi is wida guatgauna. Ea drad se wider um za seina Schreibarei.
Da Andreas schreibt hiazt Dog und Nocht. Da Famida häds zwoa nia zuagem, owa des klappern fo da Schreibmaschin ganad eam schau o. Er hot se drau gweid.
Auf oamoi woa's stad in da Bude. Den gaunzn Dog woa nix zan hean. Wia si noch an längaren Zeil nu imma nix dau hot, hot da Famita amoi aun de Die Glopft. Nix zan hean, oiso hot ea's nu moi prowird, owa lauda. Wida oia meisalstü. Jezt is eam do t'Schia augauna und ea hod Dia eidred. Ea hod in Andreas ban Disch, de Oam übagreiz und den Kopf auf de Oam ligad gfundn. Auf da linkn Seidn is de fertige Gschicht glegn.Da Wiat is za eam hi und woid 'n aufwega. Hod eam aun da Schuida beild, do is a zruckgfoin. Da Wiat is gaunz schei dakeima und hot glei amoi an soz zruk dau. Wäu er si söwa ned aundas z'höfn gwust hot, hot a de Rettung augruafm. Owa de kinan a nua mea den Dod fom Andreas feststön. Da oame Bua is gaunz oafoch dahungad und eam hod da Schlof gföd. Das sowos wiagli nu megli is heizadogs???
Weil ea koane Vawaundn ghobt hod, wean seine boa Sachal auf 'm Flomoagd gschmissn. De Gschicht wird ois draufgobe fia a boa aundere Biacha gem. Der Mau hod 's ban durchblaln recht intaresannd gfuntn. Ausadem is eam a goa ned so blede Idee keima.
Und Recht hod ea ghod. De Gschicht hod si guat fakaft. Jezt woid ea mea üba'n Andreas wissn. Wia ea endli herausgfund'n hot wia des mit 'n Andreas wirkli woa, is er hergauna und hot an scheinen Grobstoa auf des Grob sezn losen, mit oana schein Inschrift. Damit des Gaunze a besas Gsicht hod. Da Andreas im Hümi gfreid si sicha.
Do siacht ma 's wieda wias is im Lem. Da Andreas is schau so weit hibei gwen ban Eafoig. Ea hot 'n blos leida nimma ealem kina.