AutorIn des Beitrages:
Glawischnig Werner
9620 Hermagor
glawischnig.59@aon.at
Zurück | Oba sunst a Hearz und a Seel!
Do woar a klans Biable, recht schüchtan und brav,
Fritz hota ghaßn, seit seina Taaf.
Mit‘n Nochbarn sein Diandlan hota oft gschtrittn und graft,
de Muata hom öftas gmiaßt schaun, dos olls glimpflich valaft.
Woarn se allan, seint de Fetzn lei gflogn,
es woar anfoch ka Gstell,
is gach wer kummen, woar‘s still, wia betrogn,
se woarn wia a Hearz und a Seel.
De zwa hom sich vatrogn, wia de Kotz und de Maus,
ollweil a Gschra und a Mettn um‘s Haus.
Dos Diandle, de Lisa, grod on de vier bis fünf Joahr,
kana hot‘s gwußt , wos de für a Mistele woar.
In de Schual seint se kummen und woarn a schon größa,
gstenkat und graft hom se noch imma, es woar um nix bessa.
Dos Schulgwond woar zrissn, da Zegga is hin,
a Ausgschau wia grod aus da Höll,
dos Gsicht gonz vaschmiat, noch Zachalan drin,
oba sunst woarn se a Hearz und a Seel.
De Schulzeit woar aus, de Lehrzeit is kummen,
fuart hom se miaßn und hom a Orbeit ongnummen.
Wer was schon, wos aus de zwa is woarn,
se hom sich zehn Jahrlan aus de Augn valoarn.
In da Disko, beim Tonz, hot da Fritz de Lisa dasegn,
in sein Äuglan a Glonz und um sei Herzle woar‘s gschegn.
Da Funkn hupft ume, von da Lisa zum Fritz,
de Liab schlogt hiaz ein, grod wia a Blitz.
Hätta domols schon gwißt, wia‘s weita weard gehn,
miaßata heit nit zua Obwosch hin stehn.
Heiratn hot er de Lisa wohl miaßn,
sei greaßta Fehla, heit muaßas biaßn.
Dos Wirtshaus is gstrichn, dos Kortnspieln a,
ka Bier mehr im Haus,lei da Lisa ihr Gschra.
Mehr ols amol hot‘s Fritzle a Beul om Kopf,
von da Brotpfonn oda sunst von an Topf.
De Hond rutscht ihr aus, häufig und schnell,
oba sunst, glabt‘s ma, woarn se a Hearz und a Seel.
Da Fritz und de Lisa, de streitn durch‘s Leben,
auf der Welt konn‘s bei de zwa kann Friedn nit gebn.
Hiaz stehn sie vorn Petrus, ols war nia etwos gschegn,
sie hofft, dos da Herrgott nit olles hot gsegn,
Sie holtet ihrn Fritz gonz fest bei da Hond,
weil sie holt glabt, sie muaß allan in de Höll,
da Herrgott vagibt ihr und loßt se beinond,
weil se woarn jo sunst wohl a Hearz und a Seel.
|
