AutorIn des Beitrages:

Vadrahte Welt!

Es is nix mehr so, wia’s amol woar
heint laft beinohe oll’s vakeahrt,
de Manda hom schon griane Hoar,
dos ana do de Welt vasteaht.
Da Ane sauft Red Bull aus klane Dosn,
do Ondre hot a Achtale Hintan und fünf Lita Hosn.
Da Nochbar hot an Nosnring,
sei Freundin sicha a,
im Ohr steckt fost dos gleiche Ding,
dos seint man i schon zwa.
Sogoar de Zungen seint gepieast,
dos den Schmorrn beim schmußn gschpiast.
Piarsingschmuck im Nobl drin,
do könnt man sich den Bauch aufreibn,
wos hot dos gonze füar an Sinn,
wenn danoch de Norbn bleibn.
Man hot’s a schon wo ondas gfundn,
beim nocktn Körpa, tiafa untn.
Dos hot bestimmt an tiafan Sinn,
sunst steckat’s Klump nit übroll drin.
Do kenn i so an b’sondren Foll,
der besteht zu 10 Prozent aus Schwermetoll.
Do gibt’s noch viele ondre Sochn,
do könnt man a darüba lochn.
De Hoar wearnd jede Wochn ondas gfärbt,
war’s wenigstns noch schean gewesn,
nit wia de Hoar vom Irokesn,
donn hät ma ihn noch nit enterbt.
Lei wonna kane Hoar mehr hot,
donn geaht nix mehr mit Färbn,
für den kummt diesa Trend zu spot,
der konn sei Glotzn höchstns gerbn.
Früha sein se mitn Radl gfohrn,
do woar noch oll’s in Butta,
heint foahrn sogoar de ältan Noarrn,
mit an Kindagoartnscoota.
De flitzn durch de Autoreihn,
in da Stodt durch olle Gossn,
auf de Tüar und auseschrein,
donn liegt da Scoota auf da Stroßn.
Rollablads und Scatboardraudi,
hom am Radlweg a Gaudi.
De kumen lautlos oft von hintn,
hom ka Klingl und ka Hupn,
sie könntn ane umabind,
mit ane Bandlan oda Klupn.
Rücksichtslos auf Radlpistn,
erschreckt de ältan Pensionistn.
De Kidds, de seint heint norrnfrei
Playstation und Televischn
und bei moncha Hascharei,
konnst de Kidds dawischn.
Folgen tuan de Teixl nix,
de Eltan hom fost goar ka Mocht
se orbeitn mit olle Trix,
de Muata schreit, da Lausbua locht.
Stott Zeit, weard Money investiert,
ka Wunda, dos so viel passiert.
Der Fernseher ols Babysitta,
is für de Eltan optimal,
späta sitzn Kinda hinta Gitta
und dos is nit normal.
De Medien vahaun de Sproch,
Evends und Preimtime is da Hit,
hypa, übadrüba, Power, Kid,
cool und megageil is in,
es steckt jo soviel Weisheit drin.
Dos olles is hiaz gigapaua,
schean longsom wear i oba saua.
I hoff, dos Gonz geaht vorüba
und is a blöde Zeiterscheinung,
sunst geaht noch olles übadrüba
und dos is nit lei meine Meinung.