AutorIn des Beitrages:

Ollweil allan! , Dos Prentln!, Stellnbewerbung!

Ollweil Allan!


Geahst allan durch de Gossn
neamt schaut zua dir hear,
bist allan und valossn,
du sigst a neamb mehr.

Ka Wörtle kummt her,
von da ondaren Seitn,
du höarst es nit mehr,
a Blick in de Weitn.

Dei Herz is vaschlossn,
de Äuglan seint blind,
host Tränen vagossn,
wia a klan’s Kind.

Denkst zruck an de Zeit,
woarst ols Kind schon allan,
woar de Liab nit bereit,
zua an Biablan an klan.

Heint bist schon olt,
noch ollweil allan,
is dei Herzle noch kolt,
weard da Wind sich nit drahn.

Seint de Jahrlan vagongen,
konnst’s se nit hintadadrahn,
brauchst nit long bongen,
bist donn neama allan.



Autor: Werner Glawischnig
Text: Dos Prentln

Früha woar‘s Prentln für jedn Bua Pflicht,
a Ausnohm woar ane mit Holzfuaß und Gicht.
Es woar nit so leicht, oft gonz schean beschwerlich,
und monchmol sogoar lebensgefählich.
Bei Nocht und bei Nebl, muaßt a wos riskiern,
do konn an Prentla so monches passiern.
Von da Jauchngruam her üban Zaun, bis hin zu da Lata,
mocht da Vota a Gschra und da Hund a moat‘s Theata.
I was noch, da Zenz hot‘s schon öftas probiert,
man möcht‘s fost nit glabn, wos do olles passiert.
De Eva, de woar de scheanste vom Dorf,
auf de woar nit lei dos Zenzele schoarf.
Da Zenz woar als größta Casanova vaschrian,
a Spezialist für‘s Prentln und Diandlan vaführn.
Er denkt sich, de kriag i bei stockfinstra Nocht,
denkt on de Eva und hot dabei glocht.
Da Zenz glabt, er kennt jedn Trick und a jede Foll,
schleicht sich um‘s Haus und kummt bis zan Stoll.
Auf amol an Knurra, da Zenz kriagt an Schreckn,
nix wia weg, denkt sich da Bua, sonst bleibst auf da Streckn.
Dos da Hund da Schnellare woar, do drauf konnst wettn,
da Zenz siagt a Lata und konn sich fost noch aufe darettn.
Sei Herz pumpat wia narrisch, de Hosn woar hin
am Hintan a Gfühl, als warn den Rex seine Reißzänt noch drin.
Jetzt hot er sich grod a bissl dafongen,
do hot da Zirkus von neuen ongfongen.
De Lata woar grod unta da Eva ihrn Fensta,
do kummt schon a Tusch, doßa glabt er sigt Gspensta.
Untn da Hund und obn de Eva mitn hauchdünnen Gwond,
dos is nit gsund und geaht üban Zenz sein Vastond.
Jetzt brauchata an guatn Rot, wos hot dos Gonze füa an Sinn,
de Woahrheit is, er kummt zu spot, denn heit is schon a ondra drin.
Do hörta an Pfiff, da Rex saußt eine ins Haus,
do woar de Gschicht fürn Zenze long noch nit aus.
Er nimmt sein Fiaß in de Händ und rennt wia besessn,
hinta ihm mocht‘s an Krocha, an Brenna am Hintan, doßa glabt, er is in de Kaktus drin gsessn.
A Knoll, a Foll, da Hintan brennt,
do is da Zenz zu longsom grennt.
Glei auf und weita ohne Gruß, sunst trifft mi noch a zweita Schuß!
Denkt sich da Zenze volla Pein,
so schean konn goar ka Eva sein,
dos i nit obfliag wia a Fliega, sunst bleibt ament da Rex noch Siega.
Ham kummta miada, goar ka Lust mehr auf a Essn,
weil in sein Hintan seint höllische Sauporstn gwesn.
Ocht Tog hot ma den Zenze nirgends mehr gsegn,
er hot daham gmiast sein Hintan wegn da Sauporstn pflegn.
Dos woar dem Casanova wohl dächtan a Lehr,
setdem sigst den Zenze beim Prentln nix mehr.
Wem sowos amol beim Prentln passiert,
der is geheilt und für immer kuriert.



Autor: Werner Glawischnig
Text: A Stellnbewerbung!

Früha woar de Soche so geritzt,
du bist di vuarstelln gongen,
host übahaupt nit gschwitzt,
es woar schon morgn onzafongen.
Am Chef is des nit glegn,
der hot da gsogt, fong on,
donn wear ma weitasegn,
schau ma, wosa konn.
Heint ist de Soche kompliziert,
zuerst kummt a Bewerbungsschreibn,
hom erst de wenigstn probiert,
konnst zwa Stund de Zeit vatreibn,
tausend Frogn steahnt parat,
hot goar nix mit’n Jop zan tuan,
do is ma gonz schean desparat
und ollweil noch nervösa wuarn.
A Putzfrau studieart de Raumkosmetik,
a Vakäufa braucht an Staplaschein,
A Londesrot braucht goar a Ethik,
do schaut so moncha teppat drein.
Se wolln von deine Zähnt an Obdruck segn,
hiaz miaßast mehr deselbn pflegn.
War recht a noch an Stuhl obgebn,
vielleicht a noch an Aidstest mochn,
a Führungszeugnis brauchst zan Leben,
dos is jo wirklich schon zan lochn.
A Lehra weard zan Psychologn,
a Hearing füar an Stroßnkehra,
bist wohl nia von ana Schule gflogn,
Hochschul für an Volksschullehra.
Dos gonze weard vakompliziert,
do wearst zum AMS zitieart,
es gibt an längaren Diskuars,
der schickt di zan Computakuars.
Dos gonze wiedaholt sich ständig,
du brauchst vielleicht a Protektion,
man konn hiaz eh schon oll’s auswendig
und da Job, der laft davon.
Wonn se nit wearn hintasteckn
und nit oll’s vakompliziearn,
bleibt da Mensch wohl auf da Streckn,
und höart auf zan exestiern.