AutorIn des Beitrages:
Fischer Wilhelm
4650 Lambach
wilhelm.otto.fischer@gmx.net
Zurück | D Scheenheit
Sö meegn sö ned. Sö gfoin sö ned.
Und drum iss eahnar um nix z bleed,
dass sa sih d Gsichta kolorian
und umadum mit Foarb auschmian :
eyeshadows blau, grea, schwoaz und rot!
Aussschaun toan maunchö wia da Tod.
Dö Augnbraun schneidn sa sih o,
ziahgn s mit an schwoazn Schminkstift noh.
Make up vadeckt dö gaunze Haut
und neamd woass, wia dös Gsicht ausschaut,
dös inta dera Schicht is glegn.
Ös is jo neamma zan dasehgn.
Dö Lippn dö wean aa vaziat,
rot, lila, süwan, blau lackiat.
Dö Hoa rasian s teuweise wegg,
trogn a Tatoo am söwign Fleck.
Nosn, Lippn, Zungan und Oahn
dö lossn sa sih oft duachboahn,
hängan duat Ring und Stiftln ei,
weu dös soi schee zan auschau sei.
Ois Foarb fia d Hoa kennt dö Natua
brünett, blond, braun, schwoaz, süwa nua.
Fia dö owa, dö sih ned meegn,
sand dö poa Foarm a wengal z weng.
Drum greifn s kräftig nei in Topf
und farm sih kuntabunt in Kopf
und stroihn afd letzt, dass Gott daboam,
mit Köpf in ollö Regnbognfoarm.
Fia d Physis owa is dös Toa
ned guat, s is schlecht, so wiarih moa.
Dö Hoa wean schpreed oda foin aus.
Dö Haut wiad foidarad, oh Graus!
Hiatzt brauchn dö, dö sih ned meegn,
fia d Hoa an Balsam, wia ma sehgn,
fia s Gsicht a Foidncrem afd Nocht. -
Dös hobt s ös owa ned bedocht.
Weu s ös ned zfriedn sads mit eich,
wean oa, dös is ned neich, stinkreich.
Ih sog enk wos, gehts loosts ma zua :
Sö hot enk schee gmocht dö Natua!
Mei guada Rot : Bleibts doh Natua
ned retuschiat, naa, echt und pua!
|
