AutorIn des Beitrages:
Fischer Wilhelm
4650 Lambach
wilhelm.otto.fischer@gmx.net
Zurück | D Wuarm
Woarm stroihts dö Sunn! Mei, iss heit schee!
Es plaungt mih, dass ih aussigeh.
Ih ziahg mih au, spearr d Haustiar zu
und moch mih af a Friahlingstour.
Dö Bleamön bliahn! Grea wiads scho s Gros!
Da Vogögsaung! Ih sog da wos!
Mei Hearz is froh, hupft volla Freid.
So friedli is dö Friahlingszeit!
Do siahg ih gach drei Schriatt vuar mia
zan earschtn Moi heia dös Tiear.
A Regnwuarm kräut mar iwan Weg.
Ih nimm nan, dass ihn ummileg
ins Gros und eahm so s Lebm rett,
weu, trett wear draf, hättar a Gfrett.
Wiarih aft wieda weidageh,
nuh oamoi zruckschau, - weh, oh weh! -
hot sih an Aumsl niedaghuckt
und hot in Wuam oafoch vaschluckt.
Wegg woar dö friedliche Natuar
und bliebm is dö Earkenntnis nuar :
S Wüarmarettn kaust vagessn,
weus eh dö Vögö zaummafressn. |
