AutorIn des Beitrages:

Des vanachlässigte Kind

Da Vodda, de Muada, de san ma nix wülli
und wann i was kriag, is’s a Glumpat und bülli,
i kriag koane Nike, i kriag nur Oasis,
an Schuach, der nix kaun und neb’nbei a Schaß is.

Des G‘wand is net cool und de Hos’n ka Levin,
i kriagat a Noname, de guate da Kevin,
s’Handy net State of Art und a schon z’alt,
es gab schon a besser’s, des was ma fei g’fallt.

Und erst des Fress’n va da letzt‘ Wocha,
koa Bicmac, sie tuat ma des Rindfleisch vakocha
mit Erdöpföschmarr’n und an Semmökren,
des tuat’s ma z’Fleiss und ban Mäcki war’s schen…

D’raf greift se da Vodda mit’n Finga zan Hirn,
hiatzt lass’n ma den Sakkara e schon studier’n
und s’Geld wird ma a schon glei hint‘ und vorn z’weng,
des Ganze wird anders, steh af va da Beng,

vadean da dei Geld, kaf da sewa des Graffö,
i zahl da des nimma, hab koan in da Waffö,
nur s’eigene Geld macht di glückli und froh
und wannst das daleist’n kannst, mach‘s netta so !