Publikationen


Der beste Beitrag wird als "MundArt des Monats" auf dieser Seite und auf www.eurojournal.at veröffentlicht!

Fischer Wilhelm

Dö reine, büllige Kroft

MundArt des Monats Mundart-Autoren Neueinträge
Beitrag anmelden


AutorIn des Beitrages:


Fischer Wilhelm
4650 Lambach
wilhelm.otto.fischer@gmx.net

Zurück

Dö reine, büllige Kroft

D Atomkroft is a reine Kroft.
Mit dera mochn miaran Schtrom.
Do weama nuh vü Freid drau hom,
weu sie koa CO2 easchofft.

Es gibt koan sauan Regn, koan Ruass
und aundan Dreck af dera Wöt,
rein goanix, wos ma mit vü Göd
hint nochö daunn weggrama muass.

Ned so wias Ö oda dö Koin,
da Koks und olles Dös und Dos,
dö fia dös Loch-wia hoassts denn bloß-
ah, dös Ozonloch schuid sei soin.

Va d gscheidn Nuklear-Vareahra
woar dös dö Botschoft launge Zeit.
Heit owa gibts scho vüle Leit-
und Tog fia Tog wearns oiweu meahra-

dö sogn wiarih: Du liawa God!
A Kroft, dö neamd beheascht, is bled,
weu d Schtroin ausschoitn kaumma ned.
Afd letzt is olles Lem daunn tot.

Oda kennts ös fian Müll an Oart,
wo ma den sicha logan kau?
Do faungts Schlamassl nämlih au.
Vü tausnd Joahr schtroiht dea nuh foart.

Und nuh wos sogn dö Technik- Hearrn:
"Loosts zua, gfreits eich! S is gwiess,
dass da Atomschtrom büllig is.
Dagegn wiad sih woi koana weahrn."

Za dö sog ih: "Do is wos drau.
Fia dö Ruine Fukushima
und fia Tschernobyl zoihns nuh imma,
obwoi s längst hi sand. Schauts as au!"

Hiatzt foit ma gach da Goethe ei:
"O weh, oh weh!" Wos moch ih bloss?
Ih weard dö Geista nimma los!",
lossta in Zauberlehrling schrei.

Heit san dö Zauberlehrling mia.
Leida föht ins da grosse Meister,
dea bändign tat dö Kearnkroftgeister.
Moanst, geht d Wöt zgrund? Wia kimmts da fia?

 Mundart-Datenbank - Gesammelte Beiträge von Mundartautoren und Lesern zum Schmökern!