AutorIn des Beitrages:

Jahreswechsl

A Jahr is verganga
ganz schnell is des gschegn
schau außi in d' Welt
des Neiche kannst segn
was wirds uns den bringa
was hats uns zum sagn
da gabs aufammoi
so vü zum dafragn
bringts Gsundheit und Friedn
oder Krankheit und Streit
oder Liebe und Güte
und net sovü Neid
sovü Neid auf den Andern
weilst glaubst der hats leicht
sei froh daß da guat geht
hast eh ois erreicht
schau umi zu de Nachbarn
zu Krieag und zu Not
und dank jedn Tag
das mia ham a Brot
a Brot und an Friedn
bei uns da im Land
da gibst voller Freid
in neichn Jahr d' Hand
im Großn und Ganzn
woas do a so recht
san ma glücklich und zfriedn
uns gehts ja net schlecht
so zieag ma Bilanz
über s' vergangane Jahr
und suachn net krampfhaft
in da Suppn a Haar
sama glücklich und lächln
und gfrei ma uns heit
denn mit an Lächln im Lebn
da bringst das scho weit
stoß au mit an Fremdn
und mach eahm an Muat
woas alte Jahr schlecht
s' Neiche wird guat