AutorIn des Beitrages:
Kaltenböck Christine
4522 Sierning
christine.kaltenboeck@nextra.at
Zurück | Spaziergang in Jänner
A blassblauer Himml mit
ausgfranste Federwolkn,
wia giftige Spinnawebm
kreiz und quer d Kondensstroafm.
Sülbriger Raureif überall,
wo koa Sunnstrahl hi(n)glengt,
und in Wald singan d Motorsagn
schaurige Liader.
Ban Vürischaun d Bergn in Südn,
zan greifa fast der Trau(n)stoa,
ban Zruckschaun gegn Nordn
dicke, weisse Rauchwolkn über Linz.
Drüber a Stückerl Mühlviertl,
a seltsame Freud fürs Aug,
des muasst tiaf einiziahgn in d Seel,
wia in d Lung de eiskalte Luft.
s Kachlofagfühl valiert sih,
macht in Kopf wieder frei
van zimtign Keksgruch,
mitn weißn Dunst ban Schnaufm.
Hoamzua, d Sunn in Ruckn,
tanzt halbmitt in Feld
aufm glanzadn Schnee
mei gspoassiger Schattn.
|
