AutorIn des Beitrages:

Woarum Mundoat

Wäu d'Mundoat is mei Muattasproch,
wosi so gleant hob noch und noch.
Si is oafoch, eahli und peafekt
drum redi heit nu im Dialekt.

De Hochsproch is so kompliziat
und si in laungi Sätz valiat.
Is duach und duach mid Englisch gschpikt,
das ma fost ban Redn dastickt.

So sogt oana, dea mi ned vasteht:
"Bitte wiederholen, wenn es geht!"
In da Mundoat dada frogn bloss,
gaunz kuaz und bündig "WOS?"

Genauso is, waun zwoa si streidn:
"Gell, sie können mich nicht leiden?"
Dagegn sogt ma in da Mundoat flott:
"Geh putz di endli, du Fallot!"

Nua ba da Liab - jo meina Söh -
gehts in da Mundoat ned so schnö.
"Ich liebe dich", sogn d'feinan Leit
und neman si fia mea ned Zeit.

In da Mundoat owa, redt ma si zaum
"I steh auf di, dua gean di haum.
Megst ned mei Schotzal wean,
wäu i hob di zan fressn gean!"

De poa Zäun, de sogn schau aus
nua Hochsproch redn is a Graus.
Gmiatli klingt da Dialekt und woam
grod so, wia d'Muattasproch dahoam.