AutorIn des Beitrages:

Bequemer reisn

Ih hab a große Reiselust,
doh ab und zua wird s´ mar zan Frust.
Wann ih de ganze Gschicht bedenk -
wird oan doh iawö `s Geld ah z´weng.

Und angmeldt sei sollst ah recht bald.
In Winter, na ! , da is`s mar z´kalt.
In Summer is`s de große Hitz,
wo ih doh allweil so vül schwitz.

Mi(t)n langa Fahrn hast ah koa Freid.
Ih findt, iazt waar`s doh an der Zeit,
sodaß ih mar was einfalln laß. -
Ih hab`s : Is `s Wetter kalt und naß,

schalt ih in Flimmerkastn ein
und stärk mih ba an Glaserl Wein.
Suach dann a Video mit Reisn.
Des wird mar nachand gleih beweisn,

daß ma mit wirklih wenig Geld
betrachtn kann de ganze Welt.
So leg ih mih aufs Kanapee,
rast mih da aus, tua d` Füaß in d´ Heh,

streng mih net an, brauch netta schaun.
Drum sag ih euch iazt in Vertraun:
Net oamal brauchst in Hintern hebm,
kannst trotzdem alles miterlebm.

Mag sein, ih ghör zan alten Eisn,
mir gfallt de Art "Bequemer reisn".