AutorIn des Beitrages:

Herbst

A buntgfarbts Laub liegt auf der Straßn,
der Herbstwind hat`s durch d´Gegnd gwaht,
und manches Bleaml steht verlassn
am Wiesnroan - koa Mensch hat`s gmaht.

D´Kinder siahgt ma Kestn klaubm,
und bunte Drachn lassn s´steign,
d´Weinrebm san voll reife Traubm,
d´Enkerl spüln nuh Ringlreign.

Selber muaß ih Äpfl brocka,
ih mach a Muas, an Strudl draus,
bal d´Sunn herwarmt, mag ih gern hocka
auf der Sunnbänk draußt vorm Haus.

Betracht in Nöbl, wia ra einfallt,
d´Tautropfm am Spinn-Netz an de Wänd,
und de Farbmpracht vo de Astern, weil bald
nimmt all eah Blüahn an End.

Auf d´Letzt laß ih den Tag vorbeiziahgn
und dank en Schöfer, was er mir gschenkt,
ah für de Jahrln, de vorbeifliagn -
warn s´ah mit Freid und Schmerz vermengt.