AutorIn des Beitrages:

Eduscho

Konn ma ohne Eduscho lebn?
Konn wea darauf a Ontwoat gebn?
Na, den Kaffee, den man I net,
Weu dea ma goanet obgehn tät.
Bei uns, do gibts füa oit und jung
Nua Meinl Jubiläumsmischung.

Na, wos I man, des san die Sochn,
Die wos die Menscheit glicklich mochn.
Des Zeig, wos kana wiakli braucht
Und voi Begeist'rung trotzdem kauft.

Ob Eiakocha, Bluatdruckmessa,
Hauspotschn, Batterientesta,
Ob Heislbesn, Wühlmausfolle,
Durt gibts auf jedn Foi füa olle,
Wos eines jedn Heaz erfreut.
Drum megn eam jo so die Leut.

I kauf durt Sockn mia und Leiberl,
Und mochmoa füa mei liabes Weiberl,
A high-tech Klumpat füa die Kich.
Sie sogt donn oft: I bitte dich,
Vaschon mi do mit diesm Schas,
Wos soi I mochn mit den Kas ?

Sie woa no nie Eduscho-Fan
Tats (Gott behüte!) noch ia gehn,
Donn hätt Eduscho nix zum lochn
Und kennt den Lodn dicht glei mochn.

In an von die Eduscho Gschäftn
Hätt sie si amoa gsegn a Westn.
Sie blattelt duach duach olle Greßn
Und sogt donn mit an Gsicht, an besn:
'Do gibts jo klane Greßn nua,
Die hom jo nix füa mei Figua!'

I moch an Blick schnö auf die Greßn
Und wos kriag I donn durt zum lesn ?
Bei vieraviazg woa durt des End -
So kla, doß man es kaum erkennt !

Mei Oide steht scho bei die Schua
Und giftlt: 'na, jetzt hob I gnua,
Fongt ois bei siebenadreißg east on !
A Frechheit, doß di goanix hom!'

I hob mi nimma hoatn kennan
Und donn is es mia aussekemman:
'Die Westn z'klan, die Schuach zu groß
Du siagst, Eduscho scheißt dia wos !'