AutorIn des Beitrages:

So schmeckt NÖ oder: Mostfest

In Naz van Moa den geht´s åll´weil guat
und heut auf d´Nåcht fåhrt er mit seiner Ålt´n fuat
zan Mostfest, weil er ei´g´låd´n is.
Gratis Tringa is eah g´wiss
und a nixi zåh´ln fia åll´s wås s´ Ess´n,
wia s´ eini gengan reisst´s´n, er håt´s vergess´n
des rote Tiachl zan Mostviertler G´wånd,
er wird gånz nervös, a so a Schånd!

A jeder håt´s ban Håls, sogår da Toni,
der steht scho´ zwisch´n de Mostbarone,
der greift si´ glei´ am Håls wia er in Naz so siacht.
Da Naz woaß nimma wia eahm g´schiacht!

Auf å´mål sågt da Naz za seiner Ålt´n Schatzi, und sie wås´n,
geh leichast ma du dei´ Unterhos´n,
de wa genau so rot wia denan eah Schal!
I woaß´s eh, de Idee is a wen´g fatal,
åber stroaf s´ g´schwind owi hinter´n Tisch
und i bind ma s´ um! Is jå eh gånz frisch!

Er geht glei´ mit den Fetzerl auf´s Månaklo,
stroaft si´s über´n Kopf, hiatzt is er froh,
weil des passt voll guat zan Mostviertlerg´wandl,
nur oa´s muass er weg schneid´n va de drei dünnen Bandl.

Hiatzt kånn er auftret´n so wia se se g´hört,
doch Sie, sie is a wen´g bös, sie is empört!
Du håst mi überrumpe´t du ålter Schuft,
i g´spür hintan Kitt´l de kålte Luft!
Sie håt so des G´fühl, sie is a bissi nackt,
es vergeht åber schnell da offizielle Akt.

Åber dånn hint´nåchi rennt da Schmäh
ba da heiß´n Schlacht am kalten Buffet!
Då wird dånn fest ummanånda g´rennt,
ma´ red´t mit Leut die ma´ går net kennt
und so kimmt´s, dass si´ a netter Herr aus Graz
si´ guat unterhålt mit unser´n Naz!

De red´n über´s Wetter, über´s Lånd,
a übern Naz sei´ schönes G´wånd,
za sein Tiachl sågt der Herr dass er´s kennt!
Den Stoff håb´ i schon g´håbt in meine Händ!?

Zack-Bumm, håt eahm da Naz scho´ oane kråcht,
der Herr der håt an Purz´lbam g´måcht,
dass er då liegt zwisch´n Naz und Toni,
der nimmt in Naz, geht mit eahm dåni
und sågt za eahm: „Entschuldig´ di´, geh weida,
va den san uns´re Ånzüg´! Des is da Schneida!“

25.3.2008 afra1@gmx.at