AutorIn des Beitrages:
Gantner Margit
5741 Neukirchen
mgantner@aon.at
Zurück | Dazuaghörn
Uugonga is eigentlich gånz harmlos:
An erschtn Adventsunntåg hat insa rechter Nåchba zschnåchz ba sein Wohnzimmerfenster an gråßn beläichtn Stern inna hänga ghåbb.
Dös håt schöö ausgschaut.
Hu i aa a påå montierscht – ban an niadn Fenster.
An naxtn Tåg siech i ban linkn Nåchba ent a Liachtkettn van Gong obm åaleichtn.
Dös håt schöö ausgschaut.
Mein Gong hu i aa aufgranteg – Liachta drei moi hi und her und ban Hennastoi aa rundummadumm.
An zweitn Adventsunntåg laicht ban hintabeign Nåchba a kloas gspezegs Bammei ban Eijgong.
Dös håt schöö ausgschaut.
Zwoa Taag håts dauascht, bis insare zwö gråßn Zirmbamm an Gåschtn auf und auf beläicht gwen hend - mit 1256 Birnei.
Ban Haus våppa ins is untaroast a kloas glänzads Schliedei mit an Rehchei vådruu aufn Dåch obm gwen.
Dös håt schöö ausgschaut.
I hu nåcha gach a Doppögspann mit zwoa laichtande Rentier mit a so a vier Meter kafft und da Keil Walter håt ma dia Trimma mit n Kran aufs Dåch auffi.
Wånn ma ba da Vorstådlreib aufakemma is, håt ma gånz ois erschts amoi insa Haus va da Dunkön außa gsechn.
Dös håt sooo schöö ausgschaut.
Daschlåfn hu i neama recht guat, weils sovü höe an Zimmer gwen is – åwa z Liachtmess is eh wieder a Ruah hergonga.
Und an Hörest is va da Liachtgenossenschaft a Rechneng kemma, die håt mi auf n Åsch ghaut und mia is a Liacht aufgonga.
Hoija homma glei an Adventkrånz mit 4 Keschzn.
(Gong = Balkon)
|
