AutorIn des Beitrages:

Schwammerl suacha

Im Früahsommer wachsn Schwammerl
de san „des Fleisch van Woid“.
Brauchst nur am feuchtn Bodn schau` –
im Gras und Moos da wachsn s` hoit.

Im Bia`toscha und Jungmoasch (Beerensträucher)
haum d` Rehal eah Vasteck. (Eierschwammerl)
Tua s` a bissl ausanaund –
findst bestimmt an ganzn Fleck.

Wer van Schwammerlsuacha Ahnung hot
der lebt am Land – net in da Stodt.
Findt s` wia anbaut in an Hexnkroas
nimmt nur de er kennt, va de er woaß.

Wer Woid und d` Natur net kennt
glaubt, er hot vü Glück beim Brocka.
Eahm san giftige Püsn fremd (Pilze)
glaubt – er hat grod an Joker.

Voll Freud reißt er s` aus und oh –
recht gsund und guat schaun s` aus.
Da Korb is voi` – er gfreut sih so –
bringt owa – hantige noch Haus.

Lass s` steih und tret s` net um
behutsam soll ma mit eah sei`.
San de Püsn ah schei` rundum
kaun trotzdem schau` da Wurm drinn sei`.

Va oa kaunst nur oamoi` essn
san s` giftig – liegst boid im Grab.
Das Fleisch van Woid – derfst net vagessn
is und bleibt a Gottesgab.