gedaunken-molereien
von ulli fessl

hin-gobe

söbstkontrolle, ihr ewige, treue weggefährtin, sie hots net valorn, sie hot ihr an tritt gebm.
*****

querschläga

wie a unerreichbora squashboi, kleschn ihre gedaunkn rasad schnö, zwischn ihre ohrn - sie san net zum dalenkn.
*****

gebranntes frau

du kaunst di net vabrenna an am feia
des nur in deina fantasie lodat
her auf, hysterisch noch eiswiafal suachn
her auf, zum davorenna
loss anfoch brenna
*****

emotionsoparation

sie beißt die zähn zaum, konzentriert und vorsichtig wia a urwoid-daktari ziagts splitta um splitta außa, die a gaunz a gemeine gfühsgranotn hintalossn hot. "zerscht de splitta de im hirn steckn" denkt sie si gaunz vanünftig. waun i ma s herz erscht nochan vornimm, stört mi vielleicht net goa so des bluat"
"heile, heile gänschen...es wiad jo wieda guat"
summts dabei, und wischt si zornig a träne fuart.
*****

hoffnung

zwiebock der noch eianockal schmeckt,
huastntropfn noch kaukau.
telefonklinglat wia hümmisgeign,
presslufthaummalärm wia da triumphmarsch.

schneegleckal hoch wia magnolienbam
regntropfn de streichln
wind der zum mitfliagn eilodt,
sonnenstroin wia a umormung.

bittare erinnarungen de zu lächlan werdn
sorgn de se aufs rechte moß reduziern.
a wossafoi, der noch obn rauscht,
a pfeu(l) - der in saunfte wölln sei bauh ziagt.
*****

woikn

wia schlogobastupfn
wia a watta
wia a rupfate frisch gschorne schofwoi
wia a baumwoi de grod aus da kapsel hupft
wia gfährliche monsta
wia viecha, de in koan buach zum findn san
wia augfaungte sochn von an büdhaua der nimma weida waß
wia übamiatige bochforönn
wia waun jedn moment a engl vieraschaun miassat
*****

gedaunkn

wia schwebade schnür von an auskummanan luftballon
wia unerbittliche karbidspitzn von an spezialbohra
wia grissana stoppilockn von ana oidn puppn
wias drahn von an hamstaradl in da nocht
wias flackan von an grobliachtl
wia vaschwimmade forbn von an aquarellbüdl
wia a strenga linienspiagel densd eihoidn muasst
wia de grode von ana asymptote
de ana kurvn so nohe kummt wias wü, und do dawischts as net.
*****

unsicha wia

a schwindlicha auf an brucknglanda
a liegegips entgipsta noch zwöf wochn
ana mit neicha zähnd, de a si grod mocha hot lossn
a kind am erschten schuitog
a laungzeit orbeitslosa beim vorstön geh
a jungfrau
*****

geborgn wia

a kängarubaby im beitl von da muatta
a moasalkind im bruatkostn
a edelstan im safe
a trickats bleami mittns im buach
a kindahandal in da großmuatta ihra maunteltauschn
s vakriachn im papa seina achselhöhln
s herzschloglauschn beim mau, vo demsd tramst.
*****

oart-gerecht

boshoftig, gemein, pirscht se si au
erscht knabbats a weng aun dia
des geht jo nu...
daun beißts zua
wieda und wieda
schmatzad und gierig
bluatlechzat, unbormherzig
bevors di frisst mit haut und hoar

des wunsch-krokodü
*****

unmenschliche stimmen wia...

a melancholischa schlussakkord füa klarinettn in h-moi
a wehtuarats blechas glocknbümmin, in f-dua
a feindseligs pfeifat von an bestochenen schiedsrichta
a triumphierats kreischn, von ana erfoigreichn notbremsung
a resignierads bam-gächzat, bevors schrein : "baum fällt"
a "mia is ois wuascht" plätschrat in an betoniertn bochbett
a unvagesslichs schmettan, von de knochn beim aufproin
a schluchzn, dort wo kane tränen mehr san
a gheulat dassd ganslhaut kriagts, wia fria beim fliegaalarm
a topfas bebn,vom bamal,des si vom wind net umhaun lossn wü
a giftigs zischn, waun säure und base zaumkemman
a echo zum fiachtn, vom blitz der eischlogt im hochgebirge

maunchmoi kaun i guat vasteh, dass si da van gogh a ohrwaschl ogschnittn hot.
*****

liebeskumma

weh, des ...
di dastickt obwoist eh schnaufst
di vabrennt daweust dafrierst
di datränkt in ana staubwoikn
di lahm mocht, a wauns rennst um die lebm
di zum ohnmächtig sei vadaummt
di gaunz stad werdn losst
di mit ana stumpfn hockn daschlogt
di zum bettla degradiert
*****

mittig und stü wia ...

des aug von ana optimaln wossawoog
de zaga von ana turmuhr um mittanocht
de rispn von an perfekten ahornblattl
da voitreffa in ana gfeiatn züscheibm
da übadrübrig genaue bug in an blattl papier
von an obschiedsbriaf dennst da daspoan kaunst.
*****

Viele ihrer "gedaunken-molereien" hat uns Ulli Fessl in der Mundart-Datenbank zurückgelassen. Sie bastelt spielerisch an ihren Wort-Definitionen, um gleich darauf unvermittelt direkt zu sein.

Zur Autorin:
Beruflich ist die Frau Fessl im sozialen Bereich tätig: "Weil eine 52 jährige Buchhalterin mit 35 jähriger Berufserfahrung keiner mehr haben will. Ich fühle mich aber sehr ausgefüllt, gebraucht, gemocht, erfüllt und glücklich damit.
Weil ich ein Weltmeister-Sparefroh bin, komme ich mit meinem bei mir lebendem fünfjährigen Enkelkind auch ganz gut über die Runden."

Ihre Veröffentlichungen gibt es bisher nur im Internet. Ein Kinderbuch, von ihr geschrieben und illustriert, wartet auf Veröffentlichung. Trotz Zusagen zweier Verlage scheiterte die Drucklegung bisher an den Sebstbeteiligungskosten.

Auf ihrer kleinen Homepage, einem Weblog unter http://katastrofina.meinekleine.at findet Ulli Fessl Platz für ihre Texte und Gedanken. Besucher finden Näheres zur Autorin und können ein paar Zeilen in ihrem Gästebuch
hinterlassen.
Ihren Bezug zur Mundart verdeutlicht Ulli Fessl im Weblog mit den Zeilen:
Maunchmoi, gibts so Sochn,
zum Wana, oda, a zum Lochn,
de kaun i net, auf hochdeitsch sogn
weil si - umdraht do mei Mogn.

Drum, richt i mia des jetz do ei,
wo i deaf, daun gscheat - a sei.
Net ordinär - des man i net !!!
Nua, wos auf "edel" hoit schwa geht.

"Ich bin halt eine passionierte Schreiberin, weil
geredet wird eh viel zu viel auf derer Welt :-)", so
ihr Kommentar.

Kontakt:
Fessl Ulli
Gerstnerstr. 2
A-4040 Linz
ulli.fessl@linzag.net