Mundartbeitrag von:
Neumayer Elisabeth -
3494 Gedersdorf
neumayer.elisabeth@gmx.at
Alle Mundartautoren
Mundart-Datenbank |
Hänsel und Gretel (Alte Märchen in neuem Kleid)
Hänsel und Gretel (Alte Märchen in neuem Kleid)
(Elisabeth Neumayer)
Die Eltern ham gschickt ihre Kinder in Woid.
Da woars net nur entrisch, da woars a recht koit.
Es woar goar so grauslich, dass d’Költn hat klirrt,-
und die zwa Gschroppn, de ham se verirrt.
Die Gretel hat plaatzt da Hansel hat plärrt,
doch goar nix hats gnutzt, weu de zwa hat neamd gheart.
Sie san grennt und gjappelt, voi Angst und voi Graus
und plötzlich sans gstandn vor an Lebkuchnhaus.
Des woar schu recht leiwand, denn da Hunger woar groß
und d'Lebkuchenkekserln ham gschmeckt ganz famos.
Auf amoi is gach die Tiar gangen auf. -
Da Hansel hat gschriean: „Kumm, Schwesterherz, lauf!
Doch ’s Schwesterl hat gmant: „ Geh, Bruaderherz, schau,
des is zwoar a oite, aber sehr nette Frau.“
Nur ’is Gretal hat täuscht se: De Frau woar net nett,
a Hex, des is gwesn - und mit de is a Gfrett!
Die Hex hat recht gsiaßelt:„Kummts eine zu mir!“
Doch kaum woarns im Haus, hat's verrammelt die Tiar,
und hat glei in Hansel in Stoi außigsperrt.
„Die werd i recht mästen!“ Und da Hansel hat greahrt.
„Mästn, warum? Kannst du mir des sagn?“,
hat da Hansel laut gjammert. „Na, du kannst bled fragn.
I möcht di fressen und so zaundiarre Buam
schmecken so grauslich wia ausdiarrte Ruabn.“
Da Hansel woar traurig, die Gretel hat gflennt.
Kaner hätt glaubt, dass da gibt a guats End.
Doch dann woit die Hex d’klane Gretel verbrenna,
weus gnervt und gstresst woar vom ständigen Flenna,
und hat ihr auftrogn: „Kriach ins Ofenloch schnell!“
D’Gretel hat gmant: „’s passt net eini mei Gstell.
Du muaßt ma des zagn!“ Und die Hex hat des tan.
Sofurt hat die Gretel an ihrn Hintern taucht an
und ’sTiarl vom Ofen mit’n Riegel versperrt.
Die Flammen haben glodert, die Hex, die hat plärrt.
Die Gretel hat blitzschnell ihrn Bruadern befreit,
und dann hat sie gsagt: „Kumm, jetzt feiern wia gscheit!
Hoi schnell zwa BicMac und zwa Cola light,
weu jetzt vorbei is die grausliche Zeit.“
Die zwa ham se gach zum Mc Donald vertroit
und mit’n Göld von der Hex haben die Gschrappn ois zoiht.
Da siachst, Hexen san erschtns sicher entbehrlich
und zweitens, wenns brennen, ka Spur mehr gefährlich!
|
