Mundartbeitrag von:

Glawischnig Werner    -
9620 Hermagor
glawischnig.59@aon.at

Dos Potschnkino

Ham kummst miada, gonz daschlogn,
de schware Orbeit liegt da noch im Mogn.
Wos tuan de Leit, stott gmiatlich essn,
weard glei zua Flimmakistn gsessn.
Ob ana Fronz haßt oda Konstantino,
olles huckt vorn Potschnkino.
Gonz lässig, fost in Kotschekstil,
lahnt so moncha in sein Sessl,
schaut lei bled und red nit viel,
ols wia a kronka Esl.
Jetzt sitzta do, TV is on,
glei kummt a hoarta Krimi dron.
Do blitzt‘s und krocht‘s im Kastl drin,
und schon seint viere, fünfe hin.
Es weard erdolcht, dawürgt, daschoßn
und üba Leit Benzin gegossn.
Dos rüahrt kann Hund mehr und kan Herrn,
sogor de Kinder segnt‘s gern.
Do sterbn se wia Antogsfliagn,
kana weard an Schreckn kriagn.
Und grod bei so an Telewischn,
konnst sichalich den Sepp dawischn.
Er schaut Karell, Miami oda Dallas,
heart a dos Trällan von da Callas
und mit an groaßn Daualutscha,
schauta Kotschek , Käptn Fiuscha.
Neulich schreit da Sepp, a Stroßnkehra,
er is a olta Bondvaehra,
geh Olte, bring ma a kühles Blondes,
es kummt jo glei da James Bondes,
zu seina glücklos ongetrauten Tscheßn
.und tua nit auf de Chips vageßn.
Sie flitzt rasant zum Kühlschronk hin,
woar leida nur a Flaschle drin.
Da Olte sauft‘s und dos is fix,
de Jessika kriagt wieda nix.
Doch Gott sei Donk, aus Omas Erbe,
holt sie de eisane Reserve.
Sie muaß rasant in Kella rasn ,
suns tat sie glott den Bond vapaßn.
Hiaz weard getrunkn, einegmampft,
bis dos de Hosn neama paßt,
den Bierbauch bis zan Rond bepampft
sodoß da Hauswoogzage in de Kurvn rast.
So moncha tuat do z’viel dawischn,
sitzt fett und schwar beim Telewischn.
Schau on den Sepp, den dummen Esl,
der braucht zan Fernsehn fost zwa Sessl!
Sei Familie hot aus meina Sicht,
bold eine Tonne Lebendgwicht.
Sei Oma sitzt heit auch am Stuhl,
sie bleibt bei dem Specktakl cool.
Weil sie vom Fehrnsehn nix vasteht
und goar nit waß, um wos es geht.
Ka Wunda, doß sie olles seltsom findet,
wonn ihr Sehkroft ständig schwindet.
Dos spote Mampfn a nit gwöhnt,
seint meistns schon im Glos de Zähnt.
Hät ihr da Sepp den Bond vaschwiegn,
tat sie schon long im Bett drin liegn.
Weil wenn de Oma zuaschaut is ka Ruah,
wonn‘s grod nit paßt, sie gibt ihrn Kommentar dazua.
Grod wia da Bond sich nockat mit an Girl varenkt,
da Sepp erregt sein Blick auf diese Szene lenkt,
do platzt sei Oma eine, gonz empört,
weil sie da Clinch vom Bondes stört.
Dos tuat mit ban Bilfunk schon vadriaßn,
doß se ollweil nockat rafn miaßn.
Sie kepplt holt in ana Tour,
den Seppl bringt dos föllig draus,
springt auf und schreit, jetzt hob i gnua,
Oma, für die is hiaz da Film schon aus.
Er murmelt noch, mein Gott de Frau,
de hot ka Ohnung von TV.
Für monche war dos a nit schlecht,
wonn er vom Fernsehn wegbleibn mächt.
Do tast vielleicht nit dicka wearn
und sunst war olls intakt,
ka Oma könnt die dabei störn
und kriagast a kann Herzinfakt.
Geaht‘s liaba wondan oda lafn,
und stott de Bia lei Äpfl kafn.
Dos war für jedn von uns gsund
und‘s Bäuchle war nit kuglrund.
Lost‘s doch den Sepp, den Korl und a den Tino,
allanig z‘grund gehn, daham vorn Potschnkino.