Mundartbeitrag von:
Holl Elisabeth -
4600 Wels
elisabeth.holl@outlook.com
Alle Mundartautoren
Mundart-Datenbank |
Dö guatn Vorsätz
Wia schnell is so a Jahr vorbei,
dö Moanat schwindn nah da Reih,
ma hat nuh gar net alles gmacht,
ruckt näher scho d´Silvestanacht.
Dö guatn Vorsätz, dö ih ghabt,
dö san ma hinten nachö tappt;
gredt hab ih zwoar davon als wia,
doh da Erfolg, - da wird da schia.
Der wart nuh oiweil auf sei Kema,
ih muaß ma neiche Vorsätz nehma,
vielleicht san dös dö Richtign dann,
dö ih dann ah bewältign kann.
Dös Aufsteh is ah so a Gschicht,
dö Tuchat hat a narrischs Gwicht,
sie druckt mih niada, und ih denk:
du liabe Oarbat, wart a wenk.
Bügön, flicka, oh du mei,
muaß denn dös heit ah nuh sei,
dann ah nuh zum Krama laufm
und dös nötig Zeug eikaufm.
Auf d´Nacht, da geh ih spot ös Bett,
weil mi´n Computa is´s a Gfrett,
ös fasziniert mih ja so vü
dös Gwinga beim Computaspü.
Dö Zeit, dö wird ma dann weit z´kurz,
ös folgt darauf a Leistungssturz;
dös Mittagessn gibt’s auf d´Nacht,
weil sö halt nix von selba macht.
Drum is mei Vorsatz fia näxts Joahr,
ja glaubts mas, ös is ganz gwiss woahr:
ih steh bald auf, geh friahra schlafm,
tua nimma lang ös Kastl gaffm.
Und dann schaff ih mei Oarbat gwiss,
wanns ah oft net grad wenig is.
Sollts oba doh net ganz gelinga,
weil da Erfolg lasst sih net zwinga;
Dann kinnts zum Joahresende hearn:
„Oba näxts Joahr,
näxts Joahr muass dös anders wearn.“
Elisabeth Holl Jänner 2006
|
