Mundartbeitrag von:
Wiplinger Peter Paul -
1030 Wien
wiplinger@web.de
Alle Mundartautoren
Mundart-Datenbank |
Gedichte von Peter Paul Wiplinger - www.wiplinger.eu
Mein Text ist in der Mundart des Oberen Mühlviertels (Haslach) geschrieben (ob ganz richtig, weiß ich nicht, halt mit individueller Schreibweise). www.wiplinger.eu
MEI MUATTA
mei bua
sogt mei fünfadochzjohrege muatta
zu mein fünfafufzjohregn bruada
wos vastehst denn du scho vom lebm
du bist jo nu vü zjung du host jo koa ohnung
vom lebm
--------------------------------------------------
D’ NOCHBARIN
netta a bischl bedasü
bring i eana sogt
d’ nochbarin des luada
wia i afmoch nochdem
sie ongleit hot bei mia
owa daweu wualad ses
volla neigia des euide wei
und si schaut ob i
a madl bei mia ho
oda sunst wen
wia gehts den oiweu
frogts mi scheiheile
und i sog donk da nochfrog
und schmeiß de dia zua
voa ihra nosn hinta mia
owa neile ho is blean ghead
i da nocht und do hots ma
load do de oame haud und i
ho man voagnuma das i ia
bam nextn meui
wons wieda oleit bei mia
nima de dia zuahau voa da nosn
sondan das i si einaloß
i d stum und si vieleicht
sogoa eilod af an kafe
Wien 1982
------------------------------
DA OANDARE NOCHBOA
ea wond scho long do
da ödare hea
dea mid de weißn hoa
iagandwon nochn kriag
is a kema gonz schmeui
im gsicht und gonz aloa
vo wohea des woas ma ned
im kriag woara jednfeuis ned
wei es hod nocha a neamd gem
vo de komarodn mid denan ea
gredd hed oda sunstwaos
seine leid hom friara
im behmischn a fabrik ghobt
wo genau des woas i ned
owa es san jo oile leid
vo doat don vatriem woan
de deitschstämegn de sudetn
a zeitlong woara in linz don
vadretta fia fühfedan
und kugöschreiwa wia de
aufkema san bei uns
an bsuach hoda nia ghobt
außa oameui woa oana do
mea a omtlecha koa vawonta
dea iagandwos mid mauthausn
ztuan ghobt hod sogn dleid
redn tuad a ned mid mia
owa ea griaßt oile leid
oiweu recht freindle
a jud kunnta sei
moanan dleid im oat
owa wos gwiss woas ma ned
Wien 1991
------------------------------
DA UNTASCHIAD
bei uns dahoam
om im mühvial
do griaßt de a jeda
wonst ausn haus aussegehst
er sogt gua moagn oda
servas griaß de oda
hawe de ehre oda
ah se sans asso
do in wean owa
do kennt de koana oda
wü de koana kena
a wonst scho zig joa
nem seina haust
dia on dia oft
hechstns daß se se
smäu zreissn iwa di
oda duach a gugloch
schaun af di wia af an spion
und hinta deina heast das don
muamön und zischln
owa redn duad koana mid dia
do in dem bledn wean
und drum ko i d’leid do
ned leidn
Wien 1991
-----------------------------------------
OSTAN IN ROM
Heast,
wonst noch Rom kimmst,
loß ma de Engaln sche griaßn!
Heast,
wonst noch Rom kimmst,
schau da de Heilegn guad o!
Heast,
wonst nauch Rom kimmst,
zint a Keazal o fia mei deuide Muada
und bett
vola ondaucht an Vattaunsa
fia mi, mei wei und unsare Kina!
Heast,
wonst noch Rom kimmst,
schau hi und do auffe zum Himö
und sog dem Heagod
vo mia an schen Dong
fia mei Lem!
Rom, 21.4.2009
---------------------------------------------
|
