Mundartbeitrag von:

Eder Martina    -
4600 Wels
martina.eder11@tele2.at

´s Fruahjahr is da

Ja, draußn in Wald in der grean´ Natur,
da find ih an Ausgleich, kimm kloaweis zur Ruah.
Und auf an kloan Bankerl, da rast ih an Eicht,
oills Schware fallt a(b) und ih fühl mih so leicht.

Hör d´ Vogerl sche singa, in Kuckuck laut schrein
und ´s Bacherl, wia´s rauscht, über d´ Stoana hi(n)glei(t)n.
Und obm aufm Bam siahg ih ´s Oachkatzl sitzn
und zwischn de Äst mag d´ Sunn durchiblitzn.

D´ Luft is so lind und ih fühl mih so frei,
siahg oillerhand blüahn – es is ja scho Mai.
Wia sche is doh d´ Welt, möcht an Juchza frei toa,
da kräult a kloaner Igl vürer van Stoa.

Va der Weit´ hör ih ´s Läutn zan Abmdgebet –
´s wird Zeit, daß ih hoamgeh, es is ja scho spät.