Mundartbeitrag von:

Glawischnig Werner    -
9620 Hermagor
glawischnig.59@aon.at

Olles Guate kummt von obn!

A Sprichwort sogt dos ollweil schon,
olles Guate kummt von obn
wos i nit imma glabn konn,
do sollt ma noch den Herrgott lobn,
wonn mia von obn a Ziagl aufefollt,
voll auf mein Kopf dos lei so knollt.
Wonn ma dos Guate möcht erwähnen,
es hättn ane Fedan folln können,
donn hät nit, i orma Tropf,
a moatsdrum Tute aufn Kopf.
Üban Ziagl muaß i klogn,
a Feda hät mi nit daschlogn.
Dos Sprichwort, dos is nit entscheidend,
weil so moncha drunta leidet.
Do Honse, der weard long noch tobn,
weil da Nochttopf gach von obn kummt,
do wearda nit den Himml loben,
wonn ihn danoch da Schädl brummt.
Da Topf allan, der woar zwoar hoart,
is dächtan a ka feine Ort,
oba da Inholt, der woar nit fein,
miaßat nit so stinkat sein.
Hiaz woara noß bis auf de Sockn,
i man, er war viel liaba trockn.
Im Topf, do woar jo vieles drin,
trockn gsogt, es woar Urin.
De Dame obn is a Hit,
i glab sie mog den Honse nit.
Es wird ihn ewig noch vadriaßn,
dos Sprichwort liagt und er muaß biaßn.
Do könnt an übageahn de Goll,
dos woar bestimmt ka Einzlfoll.
Von Hons de Freindin haßt Albine,
wohnt mit ihm om Hügl drobn,
sie dawischt de Dochlawine,
olles Guate kummt von obn.
A Schnee om Feld warat jo guat,
oba nit so a Haufn auf Albines Huat.
Olles wos vom Himml follt,
und auf unsre Erdn knollt,
da Komet, da Hogl, Regnguß,
Ziagl, Stana und Granatnschuß,
Flugzeugobsturz, Paragleita,
Maura, Fenstaputza und so weita,
olle seint von obn kumen,
direktn Flug hom se holt gnumen.
Nit amol da Regn is a Segn,
wonn es schaflweise giaßt,
is monches unta Wossa glegn,
wonns übas Ufa auseschiaßt.
De Moral von diesa Gschicht,
i glab an solche Sprüche nicht.
Do homse dächt an Fehla gmocht an grobn,
weil goar nix Guates kummt von obn!