Mundartbeitrag von:

Glawischnig Werner    -
9620 Hermagor
glawischnig.59@aon.at

Galaktischer Rundflug

Es is schon weit de Galaxie,
so weit woar i noch nie,
Mei höchsta Flug, Ochttausnd Meta,
und von da Stiagn oba auf de Bretta.
Woarn bade Flug nit ongenehm,
de Londung woar a nit bequem.
Hiaz oba start i durch,
ziag on bequeme Schuach,
ras so schnell olls wia noch nie,
Endstation Cap Kennedy.
Eine in de Mondraketn,
schmeiß mi in den Raumonzug,
fong schon amol on zum Betn
und wünsch ma noch an guatn Flug.
Do heb i ob mit moatsdrum Kroch,
und lieg im im Sessl holbwegs floch.
Schon woar i in da Stratosphäre,
für Astronautn eine Ehre,
Fliag rasant hiaz drübaause,
war hiaz Zeit füa eine Pause.
Hiaz war schean longsom Zeit,
für de Lichtgeschwindigkeit.
Do druckts ma zom die gonzn Pana,
de Erdn weard hiaz ollwei klana,
bin grod dem Mond noch ausdawichtn,
man konn nit sogn i war gschlichn.
Doch plötzlich follt ma ein,
i brauchat wieda eine Pause,
drah wieda um beim Mond sein Schein,
do hau i donn mei Klumpat ause.
I gib wieda Gas und ans, zwa, drei,
bin schon beim Mars vorbei.
Dort is ka guats Klima heit,
weil es is jo Summazeit.
I denk noch, jo wenn es ginge,
fliag i durch die Neptunringe.
Mei Navi oba sogt dos kloar,
durt kummt öftas Stanschlog voar.
Holt bei da Venus nit im Tram,
von der hob i selba gnua daham.
Vom Merkur fliag i eiligst fort,
den homa schon in unsan Ort.
Den Saturn los i link liegn,
i mächt jo nit an Schnupfn kriegn.
Do wars um mei Gesundheit schade,
es hot durt hundat Minusgrade.
A Stopp beim Pluto sich nit lohnt,
mei Klumpat is schon aufn Mond.
Bei da Sun vorbei, weil i jo was,
do is ma eindeutig zu haß.
Hiaz hob i dos System valossn,
und wear hiaz dos All obrosn.
Mit Dreihundatdreißigtausend Kmh,
tua i ma a bisl schwar,
auf da Milchstroßn brauchst mehr Gas,
sunst mocht de Expedition kann Spaß.
und weil i noch Reservn hob,
fliagt mei Raumschiff hiaz mit Wop.
Dos is aus meina Sicht,
tausend mol schnella ols do Licht.
Und trotzdem brauch i und dos is woar,
noch Alpfa Zentauri hundat Joahr.
Soviel Zeit, de hob i nit,
hob a zan essn nit viel mit.
Bin desholb von da Stroß obgebogn,
dos woar da Fehla meines Lebens,
do hot mei Navi gonz schean glogen,
den Hamweg suach I hiaz vagebens.
Im leern Raum und gonz valossn,
mog i neama weitagrosn.
I fliag dahin und sig ka End,
dos woar i bisher goar nit gwänet.
Wos nutz hiaz Navi und da Wop,
wonn i goar ka Ziel mehr hob.
Da Weltraum is unendlich weit,
drum fliag i durt noch heit.
I woch auf und bin daham,
jo Gott sei Donk, es woar a Tram.