Mundartbeitrag von:

Glawischnig Werner    -
A-9620 Hermagor
glawischnig.59@aon.at

Da Wunschzwerg!

Do Jockl woar a Jagasbua,
er schleicht sich zeitig in da Fruah,
mit seina Flintn auf an Berg,
er konn heint ka Gams nit finden,
sondan lei an Zwerg.
Da Jockl denkt sich, is dos fein,
es könnte jo a Wunschzwerg sein.
Und wirklich, is so ana gwesn
und hot a Zaubakroft besessn.
Do spricht da obgezwickte Wicht,
Jockl, du host drei Wünsche frei,
wähle gut und fluche nicht
und was du wünscht, is einerlei.
Do gibts nit viel zan übalegn,
sogt da Jockl zu dem Wicht,
is wohl an seina Oltn glegn,
dos liest dem Buabn ausn Gsicht.
Er leidet man i ollweil noch,
unta seinem Ehejoch.
Zuerst will i a wundascheane Braut,
de nit mit ana Brotpfonn haut.
Ols Zweites mächat i viel Geld,
dos ma eh schon ollweil fehlt.
Den drittn Wunsch heb i ma auf,
kennat sein, i pfeif a drauf.
Do sogt da Zwerg, du wirst schon sehn,
dein Wunsch wird in Erfüllung gehn.
Den dritten Wunsch behalt ein Jahr,
dann sprich in aus und er wird wahr.
Volla Freid rennta hiaz ham
und glabt, dos gonze woar a Tram.
Er saust ins Zimma gonz vawegn,
do is imma noch sei Olte glegn.
Ollweil noch dos gleiche Gsicht,
da Jockl, der vagißt dos nicht.
Der Wunsch is voll danebn gongen,
hiaz hoffta holt mit Ongst und Bongen,
da zweite weard wohl funktioniern,
donn könnt i mia a Neiche kafn,
er fongt glei on zan spekuliern
und steaht schon wieda auf da Safn.
Von an Reichtum woar ka Spur,
de gleichn oltn, zrissnen Schuah.
Jetzt hot da Bua so seine Zweifl,
da zweite Wunsch is a beim Teifl.
Vielleicht is olls a Irrtum gwesn,
da Zwerg hot de Adress vageßn.
Den Wicht, den muaß i kriagn,
der konn jo nit so ummaliagn.
Damit dos olles schnella geaht,
wünschta sich holt aufn Berg.
Dos woar leida gonz verkeahrt,
weil weit und breit woar do ka Zwerg.
Er heart schon wia sei Olte sempat,
weil er den Drittn a vaplempat.
Vom erstn Wunsch hot se jo keine Ohnung,
sunst fligats Jockle aus da Wohnung.
Hiaz bleibt holt leida olls beim Oltn,
er muß sich a sei Olte kholtn.
Da Reichtum schleicht sich a nit ein,
dos könnt vielleicht jo Pech a sein.
Mit seine holb zarissne Latschn,
muaßa vom Gipfl obahatschn.
Da gonze Tog woar hiaz vadorbn,
füar ihn seint olle Zwerge gstorbn.
Er hot dos Sprichwort nit gekennt
und sich do gonz schwar varennt.
Da Jockl hot nit dron gedocht,
träumen soll man in da Nocht.
Und jeda Dummkopf kennt de Gschicht,
Wünschezwerge gibt es nicht!!!