Mundartbeitrag von:

Seier Jutta    -
7423 Grafenschachen
8sonne44@gmail.com

80

I hob amul so umadumgstudiert,
wie mans schofft,
und 80 Joahr olt wird.
Friacha hom die Leit jo koan Luxus kennt,
do sans no z'fuass zan oarweitn aufn Ocka grennt.
Die Windln homs mit da Haund ausgwoschn,
Schuklad und Zuckaln homs a net ghob zan noschn.
Fiars Hausbaun homs die Ziagln no sölwa brennt,
an Fernsehr hot a koana kennt.
"Sie" homs zu die Eltern gsogt,
Frech zan sein, hot sie koana gwogt.
A ban Lehrer hot si koana muxn traut,
der hot sunst glei mit'n Priegl auf d'Finga ghaut.
Zan Schul gehn homs oa poar Schuach ghob,und oa Garnitur Wäsch,
trotzdem woarn die Madln mit die gflouchtanan Hoar a immer fesch.
Zan jausnan hots Äpfl gebn,oda a scheim Brot,
nix Aundas hots gebn,gross woar die Not.
Wohlstaund hots nur ba die Wenigsten gebn,
die Meistn hom kämpft ums iwalebn.
Iwa die hoartn Zeitn woass i jo nix zan sogn,
do sullt ma am Bestn die Oltn frogn.
In 80 Joahr, do is scha so einiges passiert,
vielleicht is des die Auntwort,
wie mans schofft und 80 wird?
Hoarti Oarweit,und vül Verzicht,
a reins Herz und Geduld,
donn hot ma vül verricht.
Nie verzogn und nur nach vorne schaun,
und a bissl auf'n Herrgott vertraun.
A kloans Gebet vorn schloufn gei,
des wird Heit ba Maunchi a no so sei.