Mundartbeitrag von:

Oberhauser Basilius (Silli)    -
6322 Kirchbichl
oberhesi@gmx.at

Da Rausch

"Jo, sog amoi, du alter Lopp,
was host denn gestern wieder g´hob."
"Pst, moa drauf i, nit so laut,
mia is, wia wenn ma oana auf´n Kopf auffi haut,
mit gonz an kloan Hammerl, woaßt es eh,
mei, tuat mia mei Kopf heut weh."
"G´sund is da, warum bist a überall dabei,
und iatz putz da die Zähn, du stinkst aus dein Mäu."
"I moa , a Kopfwehtablett wa iatz grecht,
ah Teifi, is mia heut wieda schlecht."
"Wo bist denn gwesn, wem host denn troffn,
mit wem host denn gestern wieder g´soffn."
Mei, wias hoit so is, gestern noch da Prob,
a bois diskutiascht, a poor Biarl, Gottlob,
und do hom mas hoit gonz übag´woscht,
daß de Uhr scho auf viere zuichifoscht."
"A poor Biarl, des glab i dir glei,
wia du heaschaugst, muaß a Kistn gwesn sei."
"I woaß nu, wias zwoa hot g´schlogn,
hot da Lois nu a Runde außatrogn.
Danoch feit ma a guate Stund.
Mei bi i a blöda Hund."
"Do host iatz recht," moat drauf mei Frau,
"wei a jeds Viech woaß des gonz genau,
wenns gnuag hot, es is fost nit zan vasteh,
daß es tats oafoch nit hoam da geh."
"Jo s Viech," moa drauf i, "wos moast wias i glei liaßat,
wenn i de gonz Nocht a Wassa trinkn miaßat."