Mundartbeitrag von:
Rameder Anna -
4600 Wels
a.rameder@gmx.net
Alle Mundartautoren
Mundart-Datenbank |
Znext'n Böhmawoid ...
De koide Zeit då herom, de is laung und finsta.
Des elektresch Liacht muaß gspoart wern, a im Winta.
Da Ofn wül ständi a truckans Hoiz, sunst gad‘s ka Wärm.
Oba’s Göld zan Hoiz kaffn, jo des hätt ma hoit gern!
So wird, sei’s mitn Zugschlittn, sunst mit‘n Zoiwogn,
des gaunz Joahr s’Hoiz, des auf da Niada lad, zamatrogn.
Feistleng war‘n praktesch, åwa woher nehma und net stöhln?
Nåch‘n „Stewehocka“ und Einrama de Finganögln oft föhln.
Zweng dem håt a gscheida Kopf a guade Idee ghabd,
de za da stad‘n Zeit, a sinnvoil Oawartsaufgob bråcht håt!
Mit oide Strimpf, de oiwei nu gnuar va de Mendscha då san,
wern wia fiar’d Fleckalteppich, schmol Stroafn gschnittn, so faugts ån.
Üwalegt wiard – kunnt ma draus am End ebanst stricka?
Des wiard miahsam, wei’l d‘ Nådln dazua rosti san, de Dickan
A Bindl fiar d’Feistleng des wiard freile zerscht gmåcht,
aus ana büllign, auftrennt’n Woi, so is ausdåcht
Laungsam, im Hoibdunkl’n, mit reode, miade Aug’n,
wiard festgschtöld, ob de Stroaf’n zan Stricka a taugn.
Glei nåchn erstn Varsuach, entstengarn vüllaloar Musta und Teil.
Und fuart woar’s, -de wintaliche, koide, gfiarchte Laungweil!
A Säckl fiard Stifö, vüll bsundane und vüll komische Påår,
entstengan in a heifte Oarwartsstund’n de next‘n påar Joahr.
Owar durch’s Olta låssn d’Fiaß, zan Woidgeh boid nå
Und a da Åbgaung da stoarkn Feistleng is nimmamehr då
So kemmans oll mitnand, in a kloans, hinegs Kastarl hint im Haus.
Do håt se åbar boid gfund’n, a quartiersuarchade Maus.
Etli Påar, es is schåd um de vülle miarselige Strickarei,
denn mit de woars, noch der Niedarkunft von dera Maus – vorbei!
Åbar da Rest, soi nu laung bleib’n - und so wos beleg’n.
"Jo, -d'Not måcht erfindaresch!" I woaß, des had's gebm!
RAA
|
