Mundartbeitrag von:

Pikl Kurt    -
6380 St. Johann in Tirol
kurt.pikl@hoangascht.at

Da Frauenversteher

Da Sepp hod s'easchte Moi an Urlaub buacht,
hod sie an scheen Strond am Meer ausg'suacht,
am Prospekt send so nette Dianei im Bikini ummaglegn,
do muas a hin, des gfäud eam, des muas a segn!

Da Flieger steig gach, eam is nid woih,
jo is tad sogn er hod die Hosen voih,
nocha gibbs wos zun Trinken und a Jausn,
schaugg owa nid guad aus - an Sepp tuat eha grausn.

Donn geht's ruhig dahi - dem Sepp dem tuat des taugn,
er weascht awenk miad, er schliaßt die Augn,
auf oamoi tuat's links an Rumpla und rechts an Schnoi,
bei die Fliegln geht da Rach auf aufamoi,

da Captain möt sie iwas Mikrophon,
er is aufgereg, ma heaschz am Ton:
"Mia hommb die Kontrolle iwan Fliega valoan!
Es weascht ins boid mid da Schnauzn in die Erd eichihaun!"

Im Flugzeig ku ma a kräftig's Schitteln g'spian:
"Owa natürlich wea ma enk den Flugpreis refundian!"
Die Sauerstoffmasken kugeln aus da Luken,
ma siecht, wia die easchten a's Speibsacki eichispuken.

"Es tuat ins leid, mia kinnan owa nix mehr mochen,
bet ma zum Herrn...!" Donn wor nur des Lautsprecherkrochen!
A Frau gonz voun hod die Nerven scheints valoun
und is aufk'upft und is hysterisch woun:

"Ich will noch einmal Frau sein!" schreits gonz laut.
Reißt sie s'Gwond weck, sodass a jeda schaut,
dawei da Fliega oiwei schnoia weascht
und ma heascht wia dosch und do in die Bänk wer reascht.

Da Sepp reisst d'Hos oichi und die Pfoad,
die Frau in der eascht Reih, die tuad eam load:
"Oamoi waschen und oamoi begln häd is gean!
I hoff krod, dass mia damit no feschtig wean!"