Mundartbeitrag von:
Geissler Franz - A-7210 Mattersburg mw-fra-ge@hotmail.com
Alle Mundartautoren Mundart-Datenbank |
Da Heimwea(r)ka
Da Stoana Michl duat gea(r)n bastln
und ummanaundaschraufa ba dëi Kastln,
ois, wås hi(n) is, duat a söwa repariearn,
am lieabstn åwa mecht a s Renouviea(r)n.
Dëismoi houd ea(r) si fëist vua(r)gnaumma
a Kindazimma z måchn aus da Åbstöükaumma.
Fuaßboudn, Wäind und Dëickn woa(r)n schou(n) drau(n),
oisou, houd a si dëinkt, gëih ih hiaz d Mëiwün au(n).
Zwa Wouchn davua(r) woa(r) a mid seina Frau, da Andrea,
schou(n) wås aussuachn zum Söwabaun bam Ikea.
Zëihn Packln håm s dåzumois vou(n) dua(r)t hamza:t
und dëi lëigt a si hiaz schëin systëimatisch parat.
Kaunnst du dëis iwahaupt?, houd eah(m) d Andrea gfrågt.
Na hea(r)st, ih woa(r) schou(n) friacha bam Lego Wöd-masta!, houd ea(r) stuiz drauf gsågt.
Åwa kua(r)z drauf hea(r)t s eahm fluachn,
weu ea(r) duat schou(n) a Weu nix wia Schraufn suachn!
Daunn ëindlich is sou weid fia(r) dëin Söbst is da Mau(nn):
ea(r) faungt kounzentriea(r)t midn Zsaummbaun au(n).
Dabei schaut da fünfjahriche Kevin, sei(n) Bua,
gaunz neigierich mid ouffanan Mund ba da Oawat zua.
Af amoi is a plearad zu seina Mama zrëinna këimma,
und houd bedld, sie sui eahm in iahre Oarme nëimma.
Wås rearst dn sou, is wås passiea(r)t?,
frougt eahm sei(n) Mama gaunz irritiea(r)t.
Jå, in mein Zimma oubn, bam Schraunkzsaummbaun,
da Papa wuit an Dibü in a Louch einihaun,
und wia ra sou af d Seitn zum Plan hi(n)schaut
houd a si midn Haumma af n Dam fëist ghaut!
Dou brauchst jå ned woana, oda houst da ah wås gmåcht?
Na, eh nid, am Aunfaung håw ih eh recht glåcht!
|