Mundartbeitrag von:
Neustifter Klara -
A-4407 Dietach
klara.neustifter@gmx.at
Alle Mundartautoren
Mundart-Datenbank |
D´Spätzin
Auf da Dachreahn sitzt a Spatz
und sei Spätzin sitzt danebm
und sie sagt mei liaba Schatz,
tan ma bussln schön is´s Lebm.
Ja, ja sagt er, des moan ih e ah.
A so an Tag muass ma genießn!
Wann d´ Sunn scheint, fallts ma gar net schwaa,
schau hin, wia schon de Bladln sprießn..
Ja, wanns grean wird, sagts, des mag ih,
bald müaß ma za da Oarbat schaun.
Mei lieabs Manndl, du ih gfreih mih
narrisch schon auf´s Nestlbaun.
´s Nestbaun, des sand Weibagschichtn,
geh´s na recht bald an– dei Freud,
kannst da ois recht gmüatlih richtn,
muaßt ja sitzn drin a Zeit.
Was? fragt sie, nur ih soll schwitzn
und grad ´s Vagnügn wa füa dih.
Wanns so is, werd ih gleih vaduftn,
ih woaß was Bessers nuh füa mih!
Ih werd ma jetzt a Freundin nehma,
wanns ah mitn Eierlegn nix wird,
werd so za mein Vagnügn kemma,
ab heut bin ih emanzipiert!
|
