Mundartbeitrag von:
Fischer Wilhelm -
A-4650 Lambach
wilhelm.otto.fischer@gmx.net
Alle Mundartautoren
Mundart-Datenbank |
Mih gfreit da Summa
A hoassa Summa!
Dearis heia kumma
scho Ende Mai.
Bringt ins zan Schwitzn.
A so a Hitzn
miassat ned sei!
Oiss aundre mog ih:
D Eadbeean vatrog ih.
D Keasch farbm sih rot.
D Geaschtn wiad heidi
aa scho boid zeidi.
Mih roazt a Bod.
In iagend an See-
oh mei wiad dös schee!-
schwimm ih afd umma.
Und denk ma dabei:
Is dös ned zan gfrei?
Wos fiara Summa!
Doh ned a jeda
dalebt dös Weda
so schee wia mia.
Aundaswo taschlts,
hogöts und waschlts:
noss bis afd Knia.
A so a Weda-
dös sogt a jeda-
schofft Soargn und Kumma.
Es is so wias is.
Trotz oin is oans gwiess:
Mih gfreit da Summa!
|
