Mundartbeitrag von:
Semrau Michael - 3423 St. Andrä michaelsemrau@aon.at
Alle Mundartautoren Mundart-Datenbank |
Meine Gedichtln
Wenn i meine Gedichtln schreib,
donn is es oft a Zeitvatreib.
Denn üba G'schichtln schreib i gern
Die i erlebt hob mit da Frau.
A wenn ma kaum je einig wern
Und sie donn mant, i bin a Sau.
Denn öfta sogt sie mir, i wär
Beim schreibn vü zu ordinär.
I sog donn nua zu ihr: 'Ah wo !'
Und wurscht is es mir sowieso.
I les ihr vua, wos i grad hob,
Erwoatn derf i ma ka Lob -
Schmunzln muaß sie, des is ma wichtig,
Donn waß i: jo, so lieg i richtig.
Denn wenn sie leicht des G'sicht vaziagt,
A ondra si vua lochn biagt.
Oda i schreib üba so Sochn
Die wär'n onsich goanet zum lochn -
Weu es uns oft jo kaum no stört,
Doß Irrsinn fix zum Lebn g'hört.
So ob und zu foit ma donn ein
Beim Laufn a deppata Reim.
Der burrt im Schädl a poa Tog,
Bis i's Gedichtl fertig hob.
Und wenn ma wer an Witz dazöht,
Der lustig is und net recht blöd,
Donn wird da Witz von mir 'verdicht' -
Und fertig is a neie G'schicht
Doch monchesmoi, wenn i so schreib,
Is es mehr ois a Zeitvatreib.
Doch die Gedichtln kennt ma net
Weu des in keinem Biachl steht.
Die san füa mi nua, und füa die,
Füa die i's g'schriebn hob amoi
Monchmoi is wie a Therapie
Und sötsam is auf jedn Foi.
Ob und zu wirft's mi füachtalich
I denk ma donn: 'Du scheiß Gedicht !'
Doch wenn I's ondas woitat schreibn
Wär's bessa, i lossat's gonz bleibn.
Denn do gibt's keinen Kompromiss
Ois wird so gschriebn, wie es is.
A des, wos i sonst net leicht sog,
Und wenn i mi damit a plog.
So is da Grund moi so - moi so
Warum i schreib die Sochn do.
Und mit da Zeit kummt sche wos z'somm,
Damit d'Leit wos zum Lochn hom
|