Mundartbeitrag von:
Semrau Michael -
3423 St. Andrä
michaelsemrau@aon.at
Alle Mundartautoren
Mundart-Datenbank |
Kolateralschodn
Des Wort hot es mir ongeton:
Irgendwie hert es si so on,
Ois wa's so hoamlos, richtig nett,
So fesch, doß ma a gern an hätt.
Jo, eigentlich muaß i eich sogn,
Doß i es kaum mehr konn ertrogn:
I gspia, Hergott, da föht ma wos -
So kolateralschodnlos.
Die guate G'söllschoft geht ma o,
In der i mi befindat do.
Hoch on da Zeit wär's, doß i finde
Meine Kolateralschädlinge.
Ob's Bush is in Amerika
(der is jo haushoch führend da),
Oda die Pharmaindustrie -
Na, sovü Freind kriagt ma sonst nie.
Denn die verfoigen hehre Ziele.
Und wenn's a monchmoi aufstrat viele
Die do im Weg san - sichalich
Is des a weng bedauerlich.
Doch wenn sie in Afghanistan,
Wo sovü Terroristn san,
Amoi a Brautpoa bombadiern,
Soit uns des goanet irritian:
A jeda waß doch, san ma ehrlich:
Die Ehe is net ungefährlich !
Des wichtigste is doch da Fortschritt,
A wenn er monche in den Oasch tritt.
Denn unser Hergott is des Göd,
Des, wie ma waß, regiert die Wöd.
Nehmt's her die Handyindustrie:
Die boomt und woxd varruckt ois wie.
Die Leit hom eh fost nix im Hirn,
Und trotzdem kochans wach die Birn.
Und sehr erfoigreich, muaß i sogn:
Denn olle, die a Handy hobn
Schrein laut: 'na, wie die uns belostn,
Die vü'n neichn Handymostn !'
So bin auch i, und zwoa voi Zurn
A Kolateralschodn wur'n.
Doch jetzt daleid is nimmamehr:
jetzt muaß füa mia a ana her !
Und zwao ana, der nua mir ghert !
Es is do wiakli unerhört,
Doß i so ausgrenzt bin davon
I mechat endlich a an hom!
On meine Frau denk i sofuat
Doch die Idee woa goanet guat.
Gwehrt hot sie si, woa richtig störrisch
Und donn is wurdn direkt herrisch:
Ongschrian hots mi fuachtboa laut,
Und glei drauf hot s'mi ausseghaut.
So setz i mi jetzt in die Kraxn,
Tua auf da neinzehna recht hazn.
I suach ma an, den schneid i eine:
Er tritt voi in die Bremsn eine
Und mocht an Obgang ins Gemüse,
Streift no an Bam, liagt in da Wiese.
Erleichtert bin i und foa ham
Vom Herzn foit a schwera Stan.
Und gonz ensponnt denk i ma nua:
Na endlich: jetzt g'her i dazua !
|
