Mundartbeitrag von:
Semrau Michael - 3423 St. Andrä michaelsemrau@aon.at
Alle Mundartautoren Mundart-Datenbank |
Fu Long
I hätt ma wiakli nie gedocht,
Doß Fu Long mi zum Laberl mocht.
Und Schuid daron is nua mei Frau!
Drum schreib i´s auf jetzt gonz genau.
Mei Frau paßt auf´n Enkl auf,
Und scho nimmts Schicksoi seinen Lauf.
I sitz daham, bin miadlat schon,
Auf amoi leit des Telefon:
„Jo griaß di, Opa!“ sogt mei Frau,
´Zwoa waß i d´Zeit net so genau,
Da Fu Long is im Feansehn dron -
Den schauat ma so gean uns on.“
„Jo - und ?„ sog i. „Drahst´n hoit auf!“
„So afoch geht´s net !“ sogt sie drauf:
„So vüle Kastln hom die do,
Ans blinkt a so, des ondre so!
Und sovü Feanbedienungen!
Des is jo wiakli nimma schen!
Wie moch i des, i hob ka Ohnung,
Kenn mi net aus in diesa Wohnung!
Ferndiagnose moch i donn,
Erklär ihr, wie ma´s aufdrahn konn.
Doch vü Erfoig hob i net ghobt,
Denn iagendwonn hot sie donn gsogt:
„I mecht net so long bittn müssn -
Foah umma !! - Drah uns auf die Kistn !“
„Des denkst da so, na, mit mir net !!"
Na jo, donn hot s´mi übared´t.
Wie i donn durt im Zimma steh
Und oi die vü´n Kastln seh
Denk i ma : no, des wird scho wer´n,
Jetzt zag i denan glei den Herrn!
A Feanbedienung nimm i ma,
Druck auf an Knopf - und s´Büd is da !
„Na bitte !“ sog i, „geht doch eh !“
Doch leida woas da DVD.
Den SAT Empfänga suach i donn
Drah auf, und scho zeigt er ma´ o´.
I woat a weng, doch nix passiert,
Jetzt woa i do leicht irritiert.
Da Schirm is schworz, drauf steht: ORF 2
Des is ma nimma einerlei.
A „Sony“ is, des muaß do gehn!
I konn des afoch net vastehn.
Zur Frau sog i: „na bitte sehr!
A wennst´n net siagst, diesn Bär,
Der is no in da Mutta drin
Drum is so finsta auf´m Schirm!“
Mei Kompetenz hot sie bezweiflt,
Und i woa a scho leicht vazweiflt.
I denk ma: diese scheiß Japana!
Miasstns do könnan, soit ma mana!
Auf d´Knepf druck i herum wie wüd,
Auf amoi gibts a blaues Büd:
„Die Software wurde nicht gelodn !“
.....Wos soi i dazua jetzn sogn ?!!
I drah ois ob und wieda auf
Und schick a Stoßgebet hinauf.
Und wiakli woa - a Wunda gschiacht !
Gonz umasunst hob i mi gfiacht:
A Büdl homma und an Ton !
Wieso? - Wen int´ressiert des schon !
So woa heit mit des Schicksois Mächtn
Ausnohmsweis doch a Bund zu flechtn ...
|