Mundartbeitrag von:

Neunhäuserer Lydia    -
4755 Zell an der Pram

Neijoaskonzert

Auf da Sof hidaun liegn,
nu aweng tramhappad
vo da Silvestaparty.
Zualosn und schaun,
wias sche spün und
tanzn kinnan, d´Weana.
De Fragn vo de Kinda beantwortn,
warum da Dirigent
so umadumfuchtlt
und ses de Ballettdamen
bequem mochan
und se vo de Ballettmonna
tragn lassn.
Und jeds Joa wundat i mi wieda
was fia a Freid habn,
wanns dann gegn Schluss zuawe
zon Radezkymarsch paschn kinnan,
de Prominentn.