Mundartbeitrag von:
Chmela Gunther -
D-83064 Großholzhausen
gunther@chmela.de
Alle Mundartautoren
Mundart-Datenbank |
Oiwei vorn dro wia da Dreeg af da Schaufe
Kennsd eppa den àà?
Ea woas oiss, ea kon oiss,
Ea sogdda wia dees gähd und sell.
Ea is da Ollagscheida.
Da erschde dea sMai aufreißd,
Boi oanar amoi frogd,
Da letzde dea schdààd is,
Wannsd eh scho oiss woasd.
Grod song wannsd dààdsd,
Gäh zua, na mach du dees,
Du konsdas so guad,
Gäh zua und huifmar a weng.
Na druggda si glei.
Ea häd grod koa Zeid,
Ea häd a da Schdod drin
Ebbs wichtigs zun doa.
Und bisd schaugsd isa furt.
Am Schdammdisch af dNochd
Vazejda na broad,
Wiar ea dei Sach grichd häd.
Grod song wannsd eam duasd
Zun Dokta dààdsd geh,
Na woasa da dea glei
De recht Medizin.
Und gej, wannsdmi brauchsd,
Na sogs no frei aussa!
Af mi do konsd zejn,
I bi na scho do!
Oh mei, ja de kennma
De Sortn vo Schbezln.
Dia hànd oiwei vorn dro,
Wia da Dreeg af da Schaufe.
Hàn ned oar a da Zeidung
Ààr oiwei vorn dro,
Ganz vorn af da Seitn,
Wia da Dreeg af da Schaufe?
Gwies kennsd du de àà.
Dia wissn oiss, dia kennan oiss,
Dia songda wia dees gähd und sell.
Dia hànd de Obagscheidan.
Dia hànd oiwei vorn dro,
Und oiwei vorn drauf.
Oiwei vorn dro -
Wia da ... genau!
|
