Mundartbeitrag von:
Hermandinger Hans -
4924 Waldzell
hermandinger@inext.at
Alle Mundartautoren
Mundart-Datenbank |
Wassa
Net zum Aufwegn is mit Goid
a saubas Wassa aus n Woid.
Wassa is a großa Schatz:
Schaun ma drauf; net jeda hat's.
Wo s' Wassa fehlt, durt is koa Woad
für d' Viecha und es wachst koa Troad.
Statt greane Wiesn, Stoan und Sand;
richti oarm is so a Land.
Unsa Wassasegn rundumadum:
De ganze Welt beneidt uns drum.
Dös müass ma achtn und drauf schaun;
net d' Ufer rücksichtslos verbau'n.
Da Mensch, der macht si s' Wassa z' Nutzn,
wüll eahm den Weg und d' Freiheit stutzn;
zwingt's in a betonierte Bahn:
Bedenk o Mensch, was stöllst du an.
Machst di zum Herrn üba d' Natur;
bei'n U'wetta schlagt s' Wassa zua,
reisst d' Bruckn weg, vielleicht dei Haus,
sei froh wannst s' nackert Lebn bringst draus.
Schen langsam kemman mia do drauf:
Lass dem Wassa sein' natürlign Lauf.
Lass d' Bacherl schlingern durch die Geg'nd;
so wüll's d' Natur, a so is's g'segnt.
|
