Mundartbeitrag von:
Krautgartner Monika - monika@krautgartner-monika.at
Alle Mundartautoren Mundart-Datenbank |
lieabs Muattaherz
Lieabs Muattaherz,- is´s net a Freud,
als Kind mih z´habm, sonst kinnst net heut
recht feiern und verhatschelt wer(d)n,
den Muttertag hast eh so gern!
Doh feiern tuan wir noh net gleih,
lieabs Muattaherz, du sieaghst wohl ei(n),
dass´s weit z´vü ausschaut in der Stubm,
so dass i erst wann putzt is, kumm!
Du denkst ah heuer, hoff i, dran,
dass i koan Kuchen essn kann,
drum reiss dih bitt schee heuer zaum
und mach dein´ geilen Waldbeer-Schaum!
I muaß dir obmdrauf leider sagn,
des liegt mir echt a wen´g im Magn,
dass i mei´ Göd jetzt selber brauch
für Gwand, für Schmuck und weil i rauch!
Doh du sagst eh - und i versteh´s -
du brauchst nix und du bist net bös,
wann i nix kauf zum Muttertag,
i sieagh des ah so - gar koa Frag!
Du wünscht dir bloß,- des is koa Witz,
dass i mih giatlih zu dir sitz
a wengerl ratsch´n macht dir Freud,
nur hab i leider heut koa Zeit!
Lieabs Muatterherz, bevor i geh
lass i noh schnö´ dies´ Köberl steh
mit Bügelwäsch - und koane Sorgn,
i brauch´s heut nimmer, - aber morgn!
Vergiss net, Mam´, i hab dih gern,
von mir aus kannst ruhig 100 wer(d)n,
bleib gsund und bei der Oabeit gschwind,
des wünscht dir, Mam´, dein dankbar´s Kind!
|