Mundartbeitrag von:

kiemayer veronika    -
3363 neufurth
v.kiemayer@aon.at

Adventkraunzbindn

Des Kirchenjoahr, des findt sei End,
kimmt wieda zuwa der Advent.
Mit Glühwein, Kekserl, Kerzenglaunz
und auf dem Tisch a grüner Kraunz.

Im Pforrhof,in da Woschkuchl drunt
do geht’s heut den gaunzen Tog laung rund.
Da Pforra muass nu schnö sei Wäsch obanehma,
weil d’ Mauner scho mit dem Grassert kemman.

Sie loden’s ob im Pforrhofgortn,
wo fleißige Frauen scho drauf wortn,
und so wia jedes Joahr
findt si ein a große Schoar.

Des Kranzlbinden ist net so leicht, des is bekaunt,
do braucht ma Zeit und a gschickte Haund.
A schöns Grassert, an festn Droht,
an Roafen und a Spuln Spogot.

Daun faung ma au, Zweig um Zweig,
oft is scho a sperrigs Zeug.
Stichst di eini, wischt dir’s Bluat schnö weg,
es is jo schließlich für an guaten Zweck.

Wia i so bind, do denk i mir heut,
mit de Zweigerl, i find, is grod so wia mit de Leut.
Des Oane is stork und groß, des Aundere unscheinbor kloa,
ober i denk mir bloß, dass a jeds Astl einipasst wunderboa.

Denn es kimmt bestimmt auf d`Größ net aun,
weil ma a de Kloan gaunz guat braucha kaun.
Es find’t a jeds Zweigerl sein Plotz im Bund,
denn nur so wird der Kraunz gleichmäßig rund.

Und is er daun endlich beinaund,
gebn wir ihn weita in de nächste Haund.
Dort werdn auffigsteckt de vier Kerzn,
möge ihr Schein erwärmen unser Herzn.

Er wird nu wunderbor mit Mascherl verziert,
so dass a jeds Exemplar a Meisterwerk wird.
Noch da Reih tan wir’s auflegn, a wohre Procht!
Der Adventkraunz soll Licht gebn bis zur heiligen Nocht.

Wia’s i so betrocht, do follt mir schon wiada wos ein
und i frog mi: Kauns vielleicht gor möglich sein,
dass in unserem großen Wöltadvent
scho de vierte Kerzn brennt?

Es geht mir nimma aus dem Kopf,
i gspür, i tua mi fürchten,
denn mit an oanzigen Druck aufn Knopf
kaun ma heut des gaunze Lebn vernichten.

Herr, waun wirklich scho im Wöltadvent
de letzte Kerzn niedabrennt,
so wünsch i mir und bet,
dass daun der Engel vor uns steht,
der scho domols gsogt hot: Fürchts euch net!