Mundartbeitrag von:
Kaiser Johann -
4600 Wels
johann.kaiser@liwest.at
Alle Mundartautoren
Mundart-Datenbank |
sonntag is schlecht (eine wahre begebenheit)
in unsrm haus san vor etla joahr
fremde einzogn, mit großer kinderschoar.
sie bemüahn sih, sih zu integriern
und versuachn, unser sprach zu probiern.
neulih hab ih die leut oamal gfragt,
wia ’s eahna bei uns denn so behagt.
da vata moant drauf, a weng irritiert:
„bis auf sonntag, alles geht wie geschmiert.“
ih bin auf sei red jetzt neugierig wordn,
hab mih erkundigt nach eahnere sorgn.
da sagt die muatta mit freudiger stimm:
„von montag bis samstag, alles nicht so schlimm.“
ih bin jetzt baff, woaß nimma weita,
frag, damit ih werd nuh a wengerl gscheita:
„wiaso is denn der sonntag so schlecht,
da habt ’s ja frei, is euch des net recht?“
die oma, die sih hinter die zwoa hat vasteckt,
drängt sih vor und moant in unserm dialekt:
„ih sag dir jetzt was, guata bua,
sonntag is schlecht, weil der ‚hofer’ hat zua.“
|
