Sein Leben

Bezugspunkte
Orte

Neues
Aktuelles

Werk-
verzeichnis

Da blüahade Kerschbam

Ollweil kreuzlusti
Und trauri gor nia,
i steh do wiar a Kerschbam
in ewiga Bliah.

Enk freili wárn d' Kerschen
Schan liaber als d' Blüa,
Awá losts, dö kloan'n Keferl
Und andern liabn Tier–

Dö wurln und wousln
Auf mir umádum,
Ham eahn Gscháft und eahn Kürzweil
Und singán sumsum.

Und eahná Sumsum
Is nöt gscheidt, is nöt dumm,
Is nöt sündt, is nöt frumm
Awer eahn is halt drum.

Enk freili wárn d'Kerschen
Schau liaber als Blüa,
Awá gelts, dö kloan'n Keferl
Und andern liabn Tier –

Was fragn dö um d' Kerschen,
Eahn Welt is dö Blüa,
Was s' nöt freßen und z'knerschen,
Mensch, das ghört erst dir.

Drum allweil kreuzlusti
Und trauri gar nia,
I bleib stehn wia dá Kerschbám
In ewigá Blüa.

Wie's Bacherl so gscheid

Oft wills da nöt krea gehn,
Das is a Pein!
Do so gscheid, azwies Bacherl
Wirst denna wohl sein?!

Das windt sö und boigt sö,
Das schlingt sö und schmoigt sö,
Nur gehn, seits, nur gehn,
Olls is bössa wie's Stehn!

Ja, oft wills ain nöt krea gehn,
Das is a Pein!
Do, wies Bacherl so gscheid,
Wird ma denna wohl sein!