Jatzt habts von Markt á weng was ghert
Á Gsángel is ár allmal wert
Drum habn már eahm áh d’Ehr anthan;
– Jatzt kummt dá Petrus wiedá dran.
Von Oagn áf Rohrbáh is’s nöt weit
Und just is’s Montá – das is gscheidt,
Da geht má mit dö Wochábaurn,
Dö lassen oan brav nachischaurn.
Bán Grögá-Häufel sáns vorbei,
Dá Herr und Moastá zoagt eahm´s glei;
Dort hat ámal á Schwörzá ghauft,
Der hat schen langsam umágmaust;
Ön Zöllnán hat á Habern gstráht,
Ön Pharisäern Nasen dráht, –
Má sollt eahm`s frei nöt schuldi bleibn
Und oagns á Grögá-Büachel schreiben!
Und bis áf Rohrbáh geht´s hübsch gschwind,
Begleiten thut´s dár Oagná Wind;
Ös hat eahr allssand guating gfalln,
Dá Thurm und d´Kira halt vor alln!
Bal stengáns áf´n Platz hidan,
Da geht dös koaln und Handeln an;
Is das á Gsurmát und á Gschmátzt,
Wiar oans dös aner rátzt und trátzt!
Dá Petrus kann si´s nöt vásagn,
Er muaß si untá d´Handla schlagn;
Er denkt si: "Hiat i Geld bei mir!"
– Ös kummt eahm alls so wohlfel vür!
Ná geht´n koanár an zun Glück,
Sunst hiat´s ´n áf án Augenblick; –
Sö lösen eahm´s von Gwándel a:
Bei den sán koani Máxen da.
Er schaut á Zeit nu fleißi zua,
Wia´s Keudá treibn und lacht si gnua.
Dös Paschen, wann dá Handel geht,
Dös Halsen, wann á wiedá steht!
Dös Boiten und dös Hintenbleibn!
Dös Áffihabn und Übátreibn! –
So seltsam is´s eahm und so neu, –
Er wá nu längá gern dabei!
Da zupft´n wer, ös is sein Herr:
"Mein Petrus, du váschaust di mehr;
Was geht denn di dá Markt da an?
Bist nix zun Handeln – woaßt ás schan!
Mir kinnán doh nöt allweil stehn
Und müaßen áf´n Trostberg gehen;
Is oana nöt ön Trostberg gwön,
So kann á nöt von Rohrbáh rödn!"
|
